Memleket basshysy Mıgratsııa jónindegi halyqaralyq uıymnyń bas dırektorymen kezdesti
ASTANA. KAZINFORM – AIF aıasynda Prezıdent Qasym-Jomart Toqaev Halyqaralyq mıgratsııa uıymnyń – BUU kóshi-qon jónindegi agenttiginiń bas dırektory Emı Poýppen kezdesý ótkizdi. Bul týraly Aqordanyń baspasóz qyzmeti habarlady.
Áńgimelesý barysynda mıgratsııa boıynsha yntymaqtastyqtyń jaı-kúıi, mıgranttardyń quqyǵyn qorǵaý jáne Uıymnyń 2024-2028 jyldarǵa arnalǵan strategııalyq jospary sheńberindegi ózara yqpaldastyq máseleleri talqylandy.
Memleket basshysy elimiz zańsyz kóshi-qon problemalaryn sheshý, adam saýdasyna qarsy is-qımyl jáne shet elderde eńbek etetin qazaqstandyqtardyń quqyǵyn qorǵaý baǵyttarynda belsendi jumys júrgizetinin aıtty.
Emı Poýp Qazaqstannyń Almaty protsesine 2025-2027 jyldardaǵy tóraǵalyǵynyń mańyzyn atap ótti. Bul – aımaqtyq dıalogty ilgeriletýge jáne Ortalyq Azııadaǵy kóshi-qonǵa baılanysty problemalardyń sheshimin birlesip izdeý sharalaryn úılestirýge yqpal etetin konsýltatıvtik platforma.
Qasym-Jomart Toqaev pen Emı Poýp yntymaqtastyqty odan ári tereńdetýge, sondaı-aq ınstıtýtsıonaldy áleýetti nyǵaıtýǵa jáne aımaqtaǵy kóshi-qondy ornyqty basqarýǵa yqpal etý maqsatynda ozyq tájirıbelermen almasýǵa ýaǵdalasty.