Memleket basshysy men Dımashqa kúrte tiktik — tigin fabrıkasynyń sheberi
ASTANA. KAZINFORM — Jibek Joly telearnasyndaǵy «Bugin Live» baǵdarlamasynda «Abaı» tigin fabrıkasynyń sheberi Erqaırat Qoıanbaev óziniń kásibı mansabyndaǵy eń mańyzdy tapsyrystary týraly aıtty.
— Bizdiń fabrıkada syrtqy kıimder, jumysshylardyń kıimderi, kúrteler tigiledi. «Saryarqa» hlokkeı klýbyna sporttyq kıim tigemiz. Memleket basshysy Qasym-Jomart Toqaevqa da, Dımash Qudaıbergenge de kúrteler tigip jiberdik. Aıbek Barysovqa da («Qazaqstan Paramaýnt Injınırıng» JShS negizin qalýshy — red.) kıim tiktik. Bul tapsyrystardy bizdiń basshylyǵymyz aldy, men sonda kıim pishý tsehynyń bas mamanymyn, — dedi ol.
Mamannyń aıtýynsha, ishki naryqta fabrıka taýarlaryna suranys jetkilikti.
— Suranys kóp, búkil Qazaqstanǵa Qazposhta arqyl jiberemiz. Instagram jelisi arqyly da kóp tapsyrys túsip jatady. «Kaspi juma» aktsııasy kezinde de satýǵa taýar shyǵaramyz. Onlaın dúkenimiz de jumys isteıdi, sol arqyly satyp alýshylardan pikirin bilip otyramyz. Kóbinese onlaın jumys isteımiz, — deıdi Erqaırat Qoıanbaev.
Onyń aıtýynsha, bul fabrıka 1969 jyldan bastap jumys istegen, Keńes odaǵyna tanymal fabrıka bolǵan. Al 2000 jyldary bankrotqa ushyraıdy. 2017 jyldan bastap ony kásipker Nurhan Jumabekuly satyp alyp, qaıta aıaǵyna turǵyzǵan.
Aıta keteıik, buǵan deıin sybaılas jemqorlyqqa qarsy qyzmet Abaı tigin fabrıkasymen kelisimge qol qoıǵanyn jazǵan edik.
Eske salsaq, Memleket basshysy Qasym-Jomart Toqaev jumysshy mamandyqtaryna degen qurmetti arttyra túsý — memleket aldynda turǵan negizgi mindettiń biri ekenin aıtqan edi.
Al jumysshylar jylynyń jartysy ótkende eńbek naryǵynda qandaı ózgeris bolǵanyn myna siltemeden oqı alasyz.