Memlekettik satyp alý, kólik jáne poshta máselelerine qatysty zańǵa qol qoıyldy
ASTANA. KAZINFORM - Memleket basshysy «Qazaqstan Respýblıkasynyń keıbir zańnamalyq aktilerine baılanys qyzmetterin kórsetý, memlekettik satyp alý, kólik jáne poshta máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańyna qol qoıdy. Bul týraly Aqordanyń baspasóz qyzmeti habarlady.
Zań poshta operatorlarynyń múmkindikterin keńeıtýdi kózdeıdi. Onyń ishinde pın-kod arqyly rastaý jolymen úshinshi tulǵalarǵa poshta jóneltilimin berý jáne zań talaptaryna sáıkes dári-dármekter men medıtsınalyq buıymdardy tasymaldaý men saqtaý quqyqtary qamtylǵan.
Zań arqyly pochtomattardy ornalastyrý tártibi de naqtylanady jáne «poshta jáshigi» degen uǵym alynyp tastalady.
Áleýmettik kómek quraldaryn maqsatsyz paıdalanýdy azaıtýǵa jáne olardyń qadaǵalanýyn qamtamasyz etýge «áleýmettik ámııan» yqpal etedi. Sondyqtan zańǵa osy baǵyttaǵy norma da engizildi.
Zańnyń mátini baspasózde jarııalanady.
Aıta ketsek, Senat «Qazaqstan Respýblıkasynyń keıbir zańnamalyq aktilerine baılanys qyzmetterin kórsetý, memlekettik satyp alý, kólik jáne poshta máseleleri boıynsha ózgerister men tolyqtyrýlar engizý týraly» Zańyn eki oqylymda qarap, maquldaǵan bolatyn.