Memleket basshysy Májilistiń 2023 jyly atqarǵan jumysyna oń baǵa berdi
Memleket basshysyna Májilistiń zań shyǵarý qyzmeti týraly baıandaldy, dep habarlaıdy Kazinform Aqordanyń baspasóz qyzmetine silteme jasap.
Erlan Qoshanov sessııa bastalǵaly beri 35 zań qabyldanyp, Senatqa joldanǵanyn jetkizdi. Sonymen qatar «Ulttyq qor – balalarǵa» baǵdarlamasynyń júzege asyrylýyn, sondaı-aq jer qoınaýyn paıdalaný, bıznes júrgizý, tálimgerlik pen balalardyń qaýipsizdigi, densaýlyqqa zııan keltiretin jumys oryndarynda eńbek etetin azamattardy arnaıy tólemaqymen qamtamasyz etý máselelerin retteıtin qujattar qabyldanǵanyn aıtty.
Qazirgi ýaqytta depýtattardyń qaraýynda 69 zań jobasy jatqanyn jáne onyń úshten bir bóligine Májilis depýtattary ózderi bastamashy bolǵanyn atap ótti. Bıýdjet kodeksi, halyqtyń tym kóp nesıe alýyn tómendetý, turǵyn úı saıasaty, memlekettik satyp alý, ǵylym jáne tehnologııalyq saıasat, tutynýshylardyń quqyqtaryn qorǵaý, jylý energetıkasy, mass-medıa, adam saýdasyna qarsy is-qımyl jáne basqa da zań jobalary boıynsha jumystar júrgizilip jatqanyn jetkizdi.
Májilis depýtattary halyqtyń qarjylyq saýatyn arttyrý úshin parlamenttik tyńdaý, medıtsınalyq saqtandyrý júıesin damytý, esirtki qylmysyna qarsy is-qımyl jáne saýda saıasatyn jetildirý maqsatynda úkimet saǵattaryn ótkizgeni jóninde málimet berdi. Depýtattar jyldyń alǵashqy kúninen bastap saılaýshylarmen kezdesý jáne halyqtyń turmysyn jaqsartý jónindegi Prezıdent tapsyrmalarynyń oryndalýyna baqylaý júrgizý úshin óńirlerge attanǵanyn aıtty.
Memleket basshysy Májilistiń 2023 jyly atqarǵan jumystaryna oń baǵa berdi. Prezıdenttiń aıtýynsha, qabyldanǵan zańdar halyqtyń turmys sapasyn arttyrýǵa tikeleı yqpal etedi.
Qasym-Jomart Toqaev elimizdiń áleýmettik-ekonomıkalyq jańǵyrý baǵdaryna qatysty negizgi sharalardy júzege asyrýdy kózdeıtin zańdardy qabyldaý qajet ekenine nazar aýdardy.
