Qazir depýtattar 71 zań jobasyn qarap jatyr — Erlan Qoshanov

ASTANA. KAZINFORM — Qasym-Jomart Toqaevqa Prezıdent reformalaryn zańnamalyq turǵydan qamtamasyz etý aıasynda palatanyń atqarǵan qyzmeti týraly baıandaldy, dep habarlaıdy Aqordanyń baspasóz qyzmeti.

Májilis tóraǵasynyń aıtýynsha, sessııa bastalǵannan beri 31 zań qabyldanyp, Senatqa joldandy, sondaı-aq 15 zańǵa Prezıdent qol qoıdy. Olardyń ishinde Bıýdjet kodeksi, bırjalyq saýda máseleleri boıynsha zańdar, esirtki qylmysy úshin jazany qatańdatý, «Keleshek» biryńǵaı erikti jınaqtaýshy júıesin engizý, sottardy jańǵyrtý, ákimshilik zańnamany jetildirý jáne taǵy basqalary bar.

Qazir depýtattar 71 zań jobasyn qarap jatyr. Salyq, Sý, Qurylys, Tsıfrlyq kodeksteri men tutynýshylar quqyǵyn qorǵaý, turǵyn úı qurylysyna úlestik qatysý máselesi, qarjy naryǵyn damytý, áskerı-patrıottyq tárbıe, poshta sekildi zań jobalary boıynsha jumys júrgizilýde.

Prezıdenttiń Atyraýda ótken Ulttyq quryltaıda bergen tapsyrmasyn oryndaý maqsatynda depýtattar qyz alyp qashqany úshin beriletin jazany qatańdatý jóninde túzetýler daıyndap jatyr.

Depýtattar bıýdjet shyǵyndaryna parlamenttik baqylaý jumystaryn udaıy júrgizip keledi. Jýyrda Joǵary aýdıtorlyq palata tóraǵasynyń aýyl sharýashylyǵyn memlekettik sýbsıdııalaýdyń tıimdiligi týraly esebi tyńdaldy.

Spıkerdiń aıtýynsha, Májilis zań shyǵarý jumysynyń ashyqtyǵyna, oǵan qoǵam men sarapshylar qaýymdastyǵyn tartýǵa erekshe mán beredi. Qoǵamdyq palatanyń otyrystary turaqty túrde ótkiziledi.

Barlyq partııalyq fraktsııa depýtattary men bir mandattyq okrýgterden saılanǵan halyq qalaýlylary saılaýshylarymen jıi kezdesýler ótkizip, azamattardy qabyldap, óńirlerge saparlaıdy.

Májilis tóraǵasy parlamenttik dıplomatııa baǵytyndaǵy jumystyń qorytyndylary jóninde málimet berdi.

Erlan Qoshanov «AMANAT» partııasynyń «Aýyl amanaty» jáne «Jer amanaty», sondaı-aq Memleket basshysynyń halyqtyń qarjylyq saýatyn arttyrý jónindegi tapsyrmasyn oryndaý boıynsha atqarylyp jatqan «Qaryzsyz qoǵam» jobalary týraly aıtty.

Eske salsaq, budan buryn Memleket basshysy Jasandy ıntellektti damytý jónindegi keńes qurýdy tapsyrdy.