Memleket basshysy Májilis Tóraǵasy Erlan Qoshanovty qabyldady
ASTANA. KAZINFORM - Qasym-Jomart Toqaevqa konstıtýtsııalyq reformalardy zańnamalyq turǵydan qamtamasyz etý boıynsha Palatanyń atqarǵan qyzmeti týraly málimet berildi, dep habarlaıdy Aqordanyń baspasóz qyzmeti.
Májilis Spıkeriniń aıtýynsha, Parlament jańa Ata zańnyń normalaryn iske asyrýǵa jol ashatyn jeti konstıtýtsııalyq zańdy sapaly ári ýaqtyly qabyldady. Sonyń ishinde «Prezıdent týraly», «Quryltaı jáne onyń depýtattarynyń mártebesi týraly», «Qazaqstan Halyq Keńesi týraly», «Qazaqstan Respýblıkasy astanasynyń mártebesi týraly», «Alataý qalasynyń arnaýly quqyqtyq rejımi týraly» jáne basqa da konstıtýtsııalyq zańdar bar. Atalǵan jumys qoǵam ókilderiniń jáne sarapshylardyń qatysýymen ashyq júrgizildi.
Jalpy, Májilis sessııasy bastalǵannan beri 89 zań qabyldanyp, Senatqa joldanǵan. Olardyń arasynda Qurylys, Tsıfrlyq kodekster, jasandy ıntellekt, bank jáne bank qyzmeti, quqyqbuzýshylyqtyń aldyn alý, Qylmystyq jáne Qylmystyq-protsessýaldyq kodeksterge ózgerister engizý, memlekettik qyzmet, memlekettik nagradalar, ǵylym máseleleri, pedagog mártebesin kóterý, jemqorlyqqa qarsy is-qımyl, jeke sot oryndaýshylar qyzmeti jáne basqa da zańdar bar.
Qazir depýtattardyń qaraýynda 80 zań jobasy jatyr. Onyń qatarynda jańa Konstıtýtsııa qabyldaýǵa baılanysty raqymshylyq jarııalaý, jol qozǵalysyndaǵy tsıfrlandyrý men qaýipsizdik, jergilikti ózin-ózi basqarý, telekommýnıkatsııa naryǵyn damytý, mashına jasaý salasyn damytý, tehnıkalyq jáne kásiptik bilim berý, notarıat jáne basqa da máseleler týraly zań jobalaryn aıtýǵa bolady.
Erlan Qoshanovtyń aıtýynsha, Májilis sessııa sońyna deıin Joǵary aýdıtorlyq palata tóraǵasynyń ǵylymdy damytýǵa bólingen qarjyny oryndy jumsaý, byltyrǵy respýblıkalyq bıýdjetti ıgerýge qatysty Úkimet pen Joǵary aýdıtorlyq palatanyń esebin jáne depýtattardyń aımaqtarǵa sapary kezinde saılaýshylar tarapynan túsken ótinishterdiń nátıjeleri boıynsha Úkimettiń aqparatyn tyńdaýdy josparlap otyr.
Májilis zań shyǵarý isinde ashyqtyqqa jáne sarapshylyq toppen yntymaqtastyqqa basa nazar aýdarady. Qoǵamdyq palata otyrystary turaqty túrde ótkizilip keledi.
Qasym-Jomart Toqaevqa parlamenttik dıplomatııa baǵytyndaǵy jumys qorytyndylary, atap aıtqanda, TúrikPA, TMD Parlamentaralyq assambleıasy jáne basqa parlamentaralyq uıymdarmen yqpaldastyq jaıynda baıandaldy.
Osyǵan deıin Memleket basshysy Tokıo gýbernatory ıÝrıko Koıkeni qabyldady.
