Memleket basshysy Majarstan Premer-mınıstrimen kelissóz júrgizdi
ASTANA.KAZINFORM -Qasym-Jomart Toqaev Vıktor Orbanǵa iltıpat bildirip, byltyr Býdapesht qalasyna jasaǵan memlekettik saparyn yqylaspen atap ótti. Onyń aıasynda birqatar strategııalyq mańyzdy kelisimge qol qoıyldy. Bul týraly Aqorda habarlady.
Memleket basshysynyń aıtýynsha, naqty ýaǵdalastyqtarǵa qol jetkizý, sondaı-aq Astana men Býdapesht arasyndaǵy ózara túsinistikti nyǵaıtý turǵysynan atalǵan sapar nátıjeli boldy.
Prezıdent ekijaqty baılanystyń basym baǵyty retinde saýda-ekonomıkalyq jáne ınvestıtsııalyq yqpaldastyqty atady. Byltyr ózara saýda-sattyqtyń kólemi 200 mıllıon dollarǵa jetti, osy jyldyń alǵashqy toqsanynda taýar aınalymy 37 paıyzǵa ósti.
Qazaqstan ekonomıkasyna quıylǵan majar ınvestıtsııasy 370 mıllıon dollardan asty. Qazir eki el mashına jasaý, aýyl sharýashylyǵy jáne logıstıka salalarynda 16 birlesken ınvestıtsııalyq jobany júzege asyryp jatyr. Olardyń quny 700 mıllıon dollarǵa jýyqtaıdy.
Prezıdent Túrki memleketteri uıymynyń erteńgi beıresmı sammıtiniń mańyzyna toqtalyp, elimiz TMU qyzmetiniń barlyq basym baǵyty boıynsha syndarly dıalogty jalǵastyrýǵa beıil ekenin rastady.
Vıktor Orban saparmen kelgeni úshin Qasym-Jomart Toqaevqa alǵys aıtyp, qazaq-majar qatynastarynyń ornyqty ári qarqyndy sıpat alǵanyna nazar aýdardy.
Majarstan Premer-mınıstri sońǵy jyldary ekijaqty yntymaqtastyq, ásirese, ekonomıka salasynda belsendi damyp kele jatqanyn jetkizdi.
Sonymen qatar sammıtti uıymdastyrýǵa jan-jaqty qoldaý kórsetkeni úshin rızashylyǵyn bildirdi.
Kezdesýde byltyr joǵary deńgeıde ótken kelissózderdiń qorytyndysy boıynsha qol jetkizilgen ýaǵdalastyqtardyń, sonyń ishinde energetıka, saýda jáne ınvestıtsııa salalaryndaǵy birlesken jobalardyń oryndalý barysy talqylandy.
Budan bólek, taraptar halyqaralyq kún tártibindegi ózekti máseleler jóninde pikir almasty.
Aıta ketelik Prezıdent Túrki memleketteri uıymynyń beıresmı sammıtine qatysý úshin Býdapeshtke barǵan edi.