Memleket basshysy «Mass-medıa týraly» zańǵa qol qoıdy
ASTANA. KAZINFORM — Memleket basshysy «Mass-medıa týraly» Qazaqstan Respýblıkasynyń Zańyna qol qoıdy. Bul týraly Aqordanyń baspasóz qyzmeti habarlady.
Zań Memleket basshysynyń 2022 jylǵy 16 naýryzdaǵy «Jańa Qazaqstan: jańarý men jańǵyrý joly» atty Qazaqstan halqyna Joldaýynda memlekettiń múddelerin, qoǵamnyń suranystaryn jáne medıa salasynyń damý úrdisterin eskere otyryp, buqaralyq aqparat quraldary týraly zańdy qaıta qaraý týraly bergen tapsyrmasyn oryndaý maqsatynda ázirlendi.
Jańa Zańǵa «Buqaralyq aqparat quraldary týraly» jáne «Teleradıo habarlaryn taratý týraly» zańdardyń negizgi erejeleri endi. Atalǵan zańdar aldaǵy ýaqytta kúshin joıady. Jańa zańda birqatar tyń erejeler qarastyrylǵan. Atap aıtqanda, buqaralyq aqparat quraldarymen qatar, ınternet-resýrstardy da qamtıtyn «mass-medıa» degen jańa ári anaǵurlym keń uǵym engizildi.
Memlekettik aqparattyq saıasat júzege asyrylatyn Biryńǵaı medıa platforma qurý kózdelgen. Onyń ishinde memlekettik emes buqaralyq aqparat quraldaryna granttar berý, akkredıtteýdiń ońaılatylǵan tártibi arqyly (akkredıtatsııa kartalaryn berýdiń avtomattandyrylǵan protsesi) jýrnalısterdi memlekettik organdar men uıymdarǵa tirkeý jáne basqa da mindetter qarastyrylǵan.
Jýrnalıster úshin qosymsha quqyqtyq kepildikter belgilengen. «Jýrnalıstiń erekshe mártebesi» degen uǵym engizildi. ıAǵnı, jýrnalıstiń quqyqtary men bostandyqtarynyń qorǵalýyn, olardyń aqparat izdeý, suratý, alý jáne taratý kezindegi, sondaı-aq «Mass-medıa týraly» Zańda belgilengen ózge de erekshe quqyqtaryn jýrnalıst mártebesi dep túsiný kerek. Shyndyqqa sáıkes kelmeıtin jáne azamattardyń ar-namysyna, qadir-qasıetine jáne iskerlik bedeline nuqsan keltiretin málimetterdi teriske shyǵarý týraly BAQ-qa talap qoıý merzimi buqaralyq aqparat quraldarynda málimetter jarııalanǵan kúnnen bastap 1 jyl dep belgilengen.
Sheteldik buqaralyq aqparat quraldarynyń ókildikteri men olardyń jýrnalısterin akkredıtteý tártibi jetildirildi. BAQ-tyń suratýlaryn qaraý merzimi 7-den 5 jumys kúnine deıin qysqartyldy. Bul jýrnalısterge qajetti aqparatty qysqa merzimde alýǵa múmkindik beredi. Osylaısha aqparattyń ózektiligi saqtalady.
BAQ-tyń óz qyzmetin ózi retteý maqsatynda Zańda qoǵamdyq-kásiptik keńester qurý kózdelgen. Keńester respýblıkalyq jáne óńirlik deńgeılerde qurylýy múmkin. Bul keńesterdiń negizgi qyzmeti — Jýrnalısterdiń ádep kodeksin ázirleý. Granttyq qarjylandyrýdy engizý arqyly memlekettik aqparattyq saıasatty qarjylandyrý tetikteri jetildirildi.
Ulttyq tele-radıo habarlaryn taratý múddesin qorǵaý maqsatynda memlekettik tildegi otandyq tele-radıo baǵdarlamalardyń apta saıynǵy kólemi 50 paıyzdan 60 paıyzǵa deıin ulǵaıtyldy.
Otandyq tele-radıo arnalarda sheteldik tele-radıo baǵdarlamalaryn retranslıatsııalaý kólemi 20 paıyzdan 10 paıyzǵa deıin tómendetildi. Óz-ózine qol jumsaýdy nasıhattaıtyn aqparatty, ózin-ózi óltirýdiń joldary men oǵan úndeıtin aqparatty taratýǵa jáne (nemese) jarııalaýǵa tyıym salynady.
Zańnyń mátini baspasózde jarııalanady.
