Memleket basshysy Marat Omarovty qabyldady
ASTANA.KAZINFORM - Memleket basshysy Básekelestikti qorǵaý jáne damytý agenttiginiń tóraǵasy Marat Omarovty qabyldady. Bul týraly Aqorda habarlady.
Qasym-Jomart Toqaev Agenttik tóraǵasynyń «Ekonomıkany yryqtandyrý jónindegi sharalar týraly» Jarlyqty iske asyrýǵa arnalǵan esebin tyńdady.
Marat Omarov atalǵan Jarlyqty oryndaý aıasynda kvazımemlekettik sektordy qysqartý jáne básekelestikti damytý baǵytynda júıeli jumys atqarylyp jatqany týraly baıandady.
Jekeshelendirý jónindegi Ulttyq keńseniń tikeleı qatysýymen 2026-2030 jyldarǵa arnalǵan kvazımemlekettik sektor sýbektileri men memlekettik menshik obektilerin ońtaılandyrý jospary bekitildi.
Básekelestik ortaǵa beriletin aktıvterdiń jıyntyq kirisi 3,4 trıllıon teńge. Memlekettik satyp alý júıesin reformalaý nátıjelerine aıryqsha nazar aýdaryldy. Qabyldanǵan sharalar bir kózden satyp alý úlesin 39 paıyzdan 24 paıyzǵa deıin tómendetýge múmkindik berip otyr. Sonyń arqasynda jalpy bıýdjet aıasyndaǵy básekeli satyp alý úlesi 6,2 – 8,1 trıllıon teńgege deıin ulǵaıdy.
Bıznes sýbektileriniń taýar naryqtaryna kirýine tosqaýyl qoıatyn kedergilerdi joıý jumystary, mańyzdy naryqtardaǵy ónimsiz deldaldardan arylý boıynsha qabyldanǵan sharalar, sondaı-aq tsıfrlyq ekonomıkany retteýdiń jańa tásilderin ázirleý jónindegi bastamalar týraly málimet berdi.
Básekelestikti qorǵaý jáne damytý salasyndaǵy zańnamalyq túzetýlerdiń altynshy paketi boıynsha júrgizilip jatqan jumysqa toqtaldy.
Zań jobasynda básekelestik saıasattyń tıimdiligin arttyrýǵa, monopolııalanǵan naryqtardaǵy baqylaýdy kúsheıtýge, monopolııaǵa qarsy retteýdi jetildirýge jáne ekonomıkanyń memlekettik sektordaǵy úlesin odan ári qysqartýǵa baǵyttalǵan jeti júıeli baǵyt kózdelgen.
Kezdesý sońynda Prezıdent Agenttik tóraǵasyna birqatar naqty tapsyrma berdi.
Buǵan deıin Іshki ister mınıstri Prezıdentke esep bergen edi.
