Memleket basshysy Marai E7 Group óndiris alańynyń qyzmetimen tanysty
ShYMKENT. KAZINFORM — Prezıdent Qasym-Jomart Toqaev Shymkent qalasyna barǵan issapar aıasynda Marai E7 Group óndiris alańynyń qyzmetimen tanysty. Bul týraly Aqorda málim etti.
— Kásiporyn travmatologııa hırýrgııasynda jáne osteosıntezge keńinen qoldanylatyn dáke men tıtan ımplanttaryn shyǵarýǵa mamandanǵan. Prezıdentke Shymkentte shyǵatyn dári-dármekter men medıtsınalyq buıymdardyń túrleri kórsetildi, — delingen habarlamada.
Búginde shyraıly shahar otandyq farmatsevtıka salasynyń damýynda eleýli ról atqarady.
Munda 19 kásiporyn jumys isteıdi. Onyń ishindegi eń irisi — «Hımfarm» zaýyty.
Buǵan deıin habarlanǵandaı, Prezıdent «Tassaı» ındýstrıaldy aımaǵyn aralap kórdi.
Memleket basshysy Qasym-Jomart Toqaev Shymkent qalasynyń jurtshylyǵy aldynda sóz sóılep, óńirge jumys saparymen arnaıy kelgenin, shyraıly Shymkent elimiz úshin óte mańyzdy qala, tarıhy tereń qasterli meken ekenin atap ótken bolatyn.