Memleket basshysy Maltanyń Syrtqy ister mınıstri Ian Borchty qabyldady
ASTANA. KAZINFORM – Prezıdent Qasym-Jomart Toqaev Eýropadaǵy qaýipsizdik jáne yntymaqtastyq uıymynyń qazirgi tóraǵasy, Maltanyń Syrtqy, eýropalyq ister jáne saýda mınıstri Ian Borchpen kezdesý barysynda ekijaqty kún tártibiniń ózekti máseleleri, sondaı-aq EQYU aıasyndaǵy yqpaldastyqtyń jaı-kúıi talqylandy.
Memleket basshysynyń aıtýynsha, EQYU qaýipsizdikke tónetin qazirgi syn-qaterler jaǵdaıynda bizdiń aımaqta jáne odan tys jerlerde barlyq úsh ólshem boıynsha josparly jumys júrgizip jatyr. Sondaı-aq Qasym-Jomart Toqaev 2010 jylǵy EQYU sammıtiniń Astana deklaratsııasynda bekitilgen maqsattarǵa qol jetkizý úshin Qazaqstan barlyq tarappen tyǵyz yntymaqtastyq jasaýǵa beıildi ekenin rastady.
– Biz osy izgi maqsattarǵa jetý úshin bar kúsh-jigerimizdi jumsaýǵa, sondaı-aq jan-jaqty yntymaqtastyqqa negizdelgen qaýipsizdikti qamtamasyz etý maqsatynda Uıymǵa tóraǵalyq etip otyrǵan Maltamen birlesken jumystardy jalǵastyrýǵa daıynbyz, - dedi Prezıdent.
Kezdesý sońynda Memleket basshysy Qasym-Jomart Toqaev Malta Prezıdenti Mırıam Spıterı Debonoǵa izgi tilegin joldap, ekijaqty qarym-qatynasty nyǵaıtýǵa jáne Qazaqstan men Malta baılanystaryna tyń serpin berýge ázir ekenin jetkizdi.
