Memleket basshysy: Maqsatymyz — eńbekkerlerdi tabysty adamdardyń úlgisi retinde dáripteý
MÁSKEÝ. KAZINFORM — Prezıdent Qasym-Jomart Toqaev Qazaqstan men Reseı ózara yntymaqtastyqtyń asa mańyzdy baǵyty sanalatyn kadr daıarlaý isindegi seriktestikti dáıekti túrde tereńdetip kele jatqanyn atap ótti, dep habarlaıdy Aqordanyń baspasóz qyzmeti.
Memleketter basshylary Oral qalasynda ótip jatqan XXI Qazaqstan – Reseı óńiraralyq forýmynyń plenarlyq sessııasyna beınebaılanys arqyly qatysyp jatyr.
Prezıdenttiń sózinshe, memleket tarapynan jumysshy mamandyqtardyń bedelin arttyrý jáne qoǵamda jańa eńbek mádenıetin qalyptastyrý, sondaı-aq eńbek adamdaryn qurmetteý úshin tıisti sharalar qabyldanyp jatyr.
— Saıyp kelgende, bizdiń túpki maqsatymyz — eńbekkerlerdi tabysty adamdardyń úlgisi retinde dáripteý. Bul júzdegen myń azamatty yntalandyrady. Qazaqstan men Reseı ózara yntymaqtastyqtyń asa mańyzdy baǵyty sanalatyn kadr daıarlaý isindegi seriktestikti dáıekti túrde tereńdetip keledi. Bilim berý jáne óndiris salasyndaǵy baılanystardy jandandyrý maman daıarlaý sapasyn jetildirip, ozyq tehnologııalardy engizý úderisin údete túserine senimdimin, — dedi Memleket basshysy.
Osydan buryn Prezıdent jumysshy mamandyq ıeleri eki eldiń ekonomıkalyq órleýine orasan zor úles qosatynyna nazar aýdardy.
Sondaı-aq Memleket basshysy Reseıdiń joǵary oqý oryndary Qazaqstandaǵy ýnıversıtetterdiń kópshiligimen seriktestik ornatqanyn aıtty.