Memleket basshysy Maire Tecnimont kompanııasynyń Bas atqarýshy dırektoryn qabyldady
RIM. KAZINFORM – Qazaqstan Prezıdenti Qasym-Jomart Toqaev Italııaǵa resmı sapary aıasynda Maire Tecnimont kompanııasynyń Bas atqarýshy dırektory Alessandro Bernınıdi qabyldady. Bul týraly Aqordanyń resmı saıtynda málim etildi.
Áńgimelesý barysynda energetıka jáne munaı hımııasy salalaryndaǵy yntymaqtastyq perspektıvalary talqylandy.
Memleket basshysy kompanııanyń dekarbonızatsııa jáne energetıkaǵa kóshý jónindegi jobalardy iske asyrý isinde mol tájirıbesi bar ekenin, sondaı-aq onyń 45 elde keń kólemde jumys istep jatqanyn atap ótti.
Prezıdenttiń aıtýynsha, Qazaqstan kómirqyshqyl gazynyń qaldyqtaryn aıtarlyqtaı azaıtýǵa jáne jasyl tehnologııalardy damytýǵa baǵyttalǵan Maire Tecnimont kompanııasynyń mańyzdy josparyna zor qyzyǵýshylyq tanytyp otyr. Sebebi elimiz Parıj kelisimi aıasynda 2060 jylǵa qaraı kómirtegi beıtaraptyǵyna qol jetkizý jóninde mindettemeler qabyldady jáne óndiriste úzdik tehnologııalardy engizýge umtylady.
Alessandro Bernını Qasym-Jomart Toqaevqa kompanııanyń álem boıynsha iske asyryp jáne ázirlep jatqan iri jobalary týraly málimet berdi. Sondaı-aq Qazaqstannyń energetıka sektoryn damytý jóninde óz usynystaryn aıtty.
Memleket basshysy kompanııanyń elimizde gaz-hımııa keshenin salýǵa qatysý nıetin oń baǵalady. Maire Tecnimont kompanııasymen Atyraý oblysyndaǵy gaz-hımııa kesheni qurylysynyń ekinshi kezeginiń polımerleý ýchaskesin jobalaý jónindegi shartqa ótken jyldyń sáýir aıynda qol qoıyldy.
