Memleket basshysy MAGATE Bas dırektory Rafael Grossıdi qabyldady
ASTANA. KAZINFORM – Kezdesýde Qazaqstannyń Atom energııasy jónindegi halyqaralyq agenttikpen yqpaldastyq perspektıvasy, sondaı-aq ıadrolyq qaýipsizdikti qamtamasyz etý salasy boıynsha jahandyq kún tártibiniń ózekti máseleleri talqylandy.
Prezıdent Qazaqstan MAGATE-men uzaq jyldar boıǵy seriktestikti joǵary baǵalaıtynyn, sondaı-aq Rafael Grossıdiń jetekshiligimen Uıym ıadrolyq qaýipsizdikti nyǵaıtýǵa jáne atom qýatyn beıbit maqsatta qoldanýǵa úles qosqanyn atap ótti.
– Sizdiń 2023 jyly sáýir aıynda Qazaqstanǵa jasaǵan alǵashqy saparyńyz ózara baılanystardy damytýǵa tyń serpin berdi. ıAdrolyq qarýsyzdaný jáne jappaı qyryp-joıý qarýyn taratpaý máselesine qatysty ustanymymyz uqsas dep oılaımyn. Degenmen álemde asa kúrdeli ahýal qalyptasyp otyr. Bul jahandyq problemany sheshý joldaryn izdeýde kúsh biriktirýdi talap etedi, – dedi Memleket basshysy.
Qasym-Jomart Toqaev MAGATE-men yntymaqtastyqty tereńdetý týraly 2036 jylǵa deıingi jol kartasyna jáne ıadrolyq medıtsına men ǵylymdy damytý salasy boıynsha birqatar qujatqa qol qoıylǵanyn quptady.
Bas dırektor Qazaqstannyń álemdegi ıadrolyq qaýipsizdikti jáne jappaı qyryp-joıatyn qarýdy taratpaý rejımin nyǵaıtý baǵytyndaǵy is-qımylyna joǵary baǵa berdi
Sondaı-aq Qasym-Jomart Toqaevtyń álemdegi abyroı-bedeline, ıadrolyq qaýipsizdikti, dıalog pen kópjaqty yntymaqtastyqty ilgeriletýde dáıekti ról atqaryp kele jatqanyna toqtaldy.
Agenttik jetekshisi elimizdi AES salý boıynsha ótken jalpyhalyqtyq referendýmnyń nátıjesinde atom energııasyn damytý baǵdarlamasynyń iske asyryla bastaýymen quttyqtady.
Prezıdent Qazaqstannyń ıadrolyq qaýipsizdik pen memleketaralyq senimdi nyǵaıtýǵa baǵyttalǵan jahandyq kúsh-jigerge qosylýǵa aldaǵy ýaqytta da beıil ekenin málimdedi.
Osy rette Qasym-Jomart Toqaev tıisti halyqaralyq ýaǵdalastyq bolǵan jaǵdaıda, elimiz izgi nıetti kózdep, Irannyń ıadrolyq baǵdarlamasy tóńiregindegi máseleniń sheshilýine atsalysýǵa daıyn ekenin taǵy da rastady.
Rafael Grossı Qazaqstannyń jahandyq ıadrolyq qaýipsizdikti nyǵaıtý isindegi mańyzy men rólin atap ótip, elimizdiń ıgi bastamasyna qoldaý bildirdi. MAGATE basshysy yqtımal kelisimderdi júzege asyrý úshin Qazaqstan saıası bedelge, tıisti ınfraqurylym men ǵylymı-tehnıkalyq bazaǵa ıe ekenin jetkizdi.
Sonymen qatar Prezıdent BUU Bas hatshysy laýazymyna úmitker Rafael Grossıge sáttilik tiledi.
Aıta keteıik, Prezıdent Iordanııa Koroline quttyqtaý jedelhatyn joldady.
