Memleket basshysy: Mádenıet salasyn qoldaý — memlekettiń konstıtýtsııalyq mindeti
ASTANA. KAZINFORM — Konstıtýtsııada ultymyzdyń múddesi, maqsat-muraty men arman-tilegi aıqyn kórinis tapty. Bul týraly Aqordada mádenıet jáne óner qyzmetkerlerin marapattaý rásiminde Memleket basshysy Qasym-Jomart Toqaev aıtty.
— Naýryz aıynda bárimiz bir el, bir halyq bolyp, konstıtýtsııalyq reformaǵa biraýyzdan qoldaý kórsettik. Ortaq iske mádenıet salasynyń mamandary men óner qaıratkerderi de belsene atsalysty. Saıası naýqan kezinde halqymyz elimizdiń jarqyn bolashaǵyna úlken senimmen qarap, tarıhı tańdaýyn jasady. Osylaısha, jańa Konstıtýtsııamyz tuǵyryna qondy. Rasynda bul Qazaqstannyń keleshegin aıqyndaıtyn mańyzdy sheshim bolǵany anyq. Ata zań — el táýelsizdigi men memlekettiginiń myzǵymas kepili, halqymyz júrip kele jatqan joldyń basty temirqazyǵy, — dedi Qasym-Jomart Toqaev.
Prezıdenttiń aıtýynsha, Konstıtýtsııada ultymyzdyń múddesi, maqsat-muraty men arman-tilegi aıqyn kórinis tapty.
— Ata zańǵa sáıkes, elimizdiń egemendigin, jerimizdiń tutastyǵyn, azamattardyń quqyǵy men bostandyǵyn qorǵaý buljymas qaǵıdat sanalady. Konstıtýtsııada tarıhı-mádenı muramyzdy saqtaý máselesine de basa nazar aýdaryldy. Endi mádenıet salasyn qoldaý — memlekettiń konstıtýtsııalyq mindeti. Qazir baǵytta aýqymdy sharýa jasalyp jatyr, — dedi Memleket basshysy.
