Memleket basshysy Mádenıet ortalyǵyn aralap kórdi
ASTANA. KAZINFORM – Memleket basshysy QHR mádenıet jáne týrızm mınıstri Sýn Elımen birge Mádenıet ortalyǵyn aralap kórdi. Bul týraly Aqorda málim etti.
— Qasym-Jomart Toqaevqa kitaphana, qazaq tili, mýzyka jáne shyǵarmashylyq kabınetteri tanystyryldy. Kórme zalyna Qazaqstannyń ejelgi saq dáýirinen bastap XX ǵasyrdyń bas kezine deıingi tarıhynan syr shertetin eksponattar men artefaktiler qoıylǵan, — delingen habarlamada.
Ekspozıtsııa arheologııaǵa, zergerlik buıymdarǵa, qarý-jaraq jasaý ónerine, ult aspaptaryna jáne etnografııaǵa arnalǵan bes bólimnen turady. Ortalyqtyń kitaphana qorynda qazaq, qytaı, aǵylshyn jáne orys tilderindegi myńǵa jýyq kitap bar.
Prezıdent Mádenıet ortalyǵynda qazaq tilin úırenip júrgen balalarmen sóılesti.
Qytaı oqýshylary dombyramen belgili qazaq, qytaı áýenderinen popýrrı oryndady.
Sonymen qatar mártebeli meımandar Beıjiń balalaryna arnalǵan kıiz basýdan sheberlik sabaǵyn tamashalady.
Eske sala keteıik, buǵan deıin Memleket basshysy Qytaı astanasyna bardy.
Qasym-Jomart Toqaevtyń aıtýynsha, sapar barysynda Qytaı tarapy qazaq delegatsııasyna erekshe kóńil bólip, ystyq yqylasy men qonaqjaılyǵyn kórsetti. Memleket basshysy «Uly dala men Uly Qytaı arasyndaǵy rýhanı-mádenı baılanys eshqashan úzilgen emes» degen bolatyn.