Memleket basshysy Lı Sıan Lýnnyń Qazaqstanǵa alǵashqy saparyn tarıhı oqıǵaǵa balady
ASTANA. KAZINFORM — Aqordada Prezıdent Qasym-Jomart Toqaev Sıngapýrdyń Aǵa mınıstri Lı Sıan Lýndy qabyldady. Bul týraly Aqordanyń baspasóz qyzmeti málim etti.
Memleket basshysy áńgimelesý barysynda Lı Sıan Lýnnyń alǵashqy sapary elimiz úshin tarıhı mánge ıe ekenin atap ótti.
— Osydan 35 jyl buryn, Qazaqstan táýelsizdiginiń eleń-alańynda, ıaǵnı 1991 jyldyń qyrkúıeginde ákeńiz Lı Kýan ıÝ Qazaqstanǵa keldi. Sol sapar ózara qarym-qatynasymyzdyń berik negizin qalaǵan edi. Biz Sıngapýr basshylyǵynyń kóregen saıasatyn joǵary baǵalaımyz. Qarjy, saýda, ınnovatsııa men tehnologııanyń jahandyq ortalyǵyna aınalýdaǵy jetistikterińiz tańǵaldyrady. Sizdiń elińizdiń tájirıbesi búkil halyqaralyq qoǵamdastyqqa úlgi bolyp otyr, — dedi Prezıdent.
Qasym-Jomart Toqaev ekijaqty qarym-qatynastyń qarqyndy damyp kele jatqanyn atap ótti. Oǵan dálel — turaqty saıası dıalog, saýda-sattyqtyń ósimi jáne sıngapýrlyq kapıtaldyń kóptep tartylýy.
— Qazaqstan men Sıngapýr Ortalyq jáne Ońtústik-Shyǵys Azııa óńirlerinde iri saýda seriktesteri bolyp qala beredi. Qazaqstanda 500-ge tarta Sıngapýr kapıtaly bar kompanııa jumys isteıdi jáne olardyń qatary arta túsýde, — dedi Prezıdent.
Memleket basshysynyń aıtýynsha, elderimiz kópjaqty formattar aıasynda tyǵyz baılanys ornatqan. Eki memleket te orta derjava sanalady. Osy oraıda, Prezıdent halyqaralyq kún tártibindegi kóptegen máseleler boıynsha taraptardyń ustanymdary uqsas ekenine nazar aýdardy.
Qasym-Jomart Toqaev elimizde júrgizilip jatqan aýqymdy saıası ózgerister týraly áńgimeledi.
Memlekettik basqarý men saıası júıeni odan ári jetildirýge baǵyttalǵan bastamalar «Kúshti Prezıdent, yqpaldy Quryltaı jáne esep beretin Úkimet» qaǵıdatyna negizdelgen.
Memleket basshysy Qazaqstan qolaıly ınvestıtsııalyq klımat qalyptastyrýǵa jáne sheteldik ınvestorlardyń quqyǵyn qorǵaýǵa basa nazar aýdaratynyn aıtty.
Elimizde birqatar sıngapýrlyq kompanııalar men qorlar, sonyń ishinde PSA International, Temasek Holdings sııaqty kásiporyndar tabysty qyzmet etýde.
Budan bólek, kólik-logıstıka salasyndaǵy yntymaqtastyq barysy talqylandy.
— Biz avıatsııalyq habty damytý aıasynda arta túsken suranysqa saı bolý maqsatynda Astanada jańa zamanaýı áýejaı salý jóninde sheshim qabyldadyq. Osy oraıda, Sıngapýrdyń ozyq tájirıbesi erekshe qyzyǵýshylyq týdyryp otyr. Changı áýejaıy álemdik avıatsııada «altyn standart» retinde tanylǵan. Tıimdiligi joǵary ári ozyq ınnovatsııalar engizilgen keshen jolaýshylarǵa minsiz qyzmet kórsetedi. Biz jańa jobany iske asyrýda osy tájirıbeni eskerip, avıatsııa salasyndaǵy ekijaqty yntymaqtastyqty jańa deńgeıge kóterýge nıettimiz, — dedi Prezıdent.
Memleket basshysy Qazaqstan men Sıngapýr arasynda jasandy ıntellekt jáne tsıfrlandyrý boıynsha yqpaldastyqty jandandyrýdy usyndy.
— Qazaqstan — tsıfrlyq memleket. Elimiz tsıfrlyq tehnologııa men jasandy ıntellekt salasynda kósh bastaıdy. Buǵan osy salada júrgizilip jatqan júıeli reformalar yqpal etti. Biz Jasandy ıntellekt jáne tsıfrlyq damý mınıstrligin quryp, Tsıfrlandyrý jáne jasandy ıntellekt jylyn jarııaladyq, — dedi Prezıdent.
Sıngapýrdyń Aǵa mınıstri Lı Sıan Lýn ekijaqty yntymaqtastyqtyń kún tártibindegi ózekti máselelerdi talqylaýǵa múmkindik bergeni úshin Prezıdentke alǵys aıtyp, Qazaqstannyń áleýmettik-ekonomıkalyq damýyndaǵy eleýli jetistikterdi atap ótti.
– Alǵashqy Quryltaı saılaýynyń tabysty ótýimen quttyqtaımyn. Sizdiń jetekshiligińizben iske asyrylyp jatqan aýqymdy saıası reformalardy qoldaımyz. Ekijaqty qarym-qatynasymyz jańa ári sapaly deńgeıge kóterildi. Qazaqstan kompanııalarynyń Sıngapýr naryǵyna qyzyǵýshylyǵy artyp keledi. Osyǵan baılanysty kelisimshart-quqyq bazasy da oıdaǵydaı damýda. Investıtsııalardy ózara qorǵaý, sondaı-aq kórsetiletin qyzmetter saýdasy jáne ınvestıtsııalar týraly kelisimder ratıfıkatsııalandy. Muny atap ótken jón, – dedi Lı Sıan Lýn.
Áńgimelesý barysynda ekonomıka, kólik-logıstıka, «aqyldy» qalalardy damytý, aýyl sharýashylyǵy, asa mańyzdy mıneraldar jáne týrızm salalaryndaǵy yqpaldastyqty keńeıtý perspektıvasyna basa mán berildi.
Aıta keteıik, buǵan deıin Memleket basshysy Qasym-Jomart Toqaev respýblıkalyq Tamyz konferentsııasyna qatysty.
