Memleket basshysy: LGBT kóptegen elge ondaǵan jyl boıy kúshpen tańylyp keldi

BÝRABAI. KAZINFORM – Tramp bastaǵan Amerıka ákimshiliginiń dástúrli moraldyq qundylyqtardy qalpyna keltirýge baǵyttalǵan jumystary qoldaýǵa laıyq. Prezıdent Qasym-Jomart Toqaev Ulttyq quryltaıdyń ІV otyrysynda osyndaı paıym aıtty.

- Jahandaný úderisiniń mán-mańyzy joǵalyp barady. Memlekettik ultshyldyq, yqpal júrgizetin aýmaqtardy bóliske salý, álemdik saıasatta aımaqtarǵa bóliný úrdisi aldyńǵy qatarǵa shyqty.
Demokratııalyq moraldyq delinip júrgen qundylyqtar, onyń ishinde LGBT kóptegen elge ondaǵan jyl boıy kúshpen tańylyp, sonyń jeleýimen halyqaralyq úkimettik emes uıymdar men qorlar arqyly memleketterdiń ishki isine ashyq aralasý beleń aldy. Onyń túpki maqsaty bar bolǵany urlyq, ıaǵnı san mıllıardtyq bıýdjetti qaltaǵa basý eken, - dedi Prezıdent.

Memleket basshysy AQSh basshylyǵynyń jahandyq aýqymda áseri bar keıbir bastamalary qoldaý laıyq ekenin aıtady.

- «Damý men demokratııa», «adam quqyqtary», «baspasóz bostandyǵy», «sybaılas jemqorlyqqa qarsy kúres» dep urandatyp júrgenderdiń báriniń derlik jeke baılyǵy jalaqysynyń mólsherine esh saı kelmeıdi. Sondyqtan Prezıdent Tramp bastaǵan Amerıka ákimshiliginiń jappaı qyzmet babyn asyra paıdalanýǵa qatysty oqıǵalardy anyqtaýǵa jáne «tuńǵıyq memleket» uǵymyna tán saıası ekijúzdilikti áshkereleýge, dástúrli moraldyq qundylyqtardy qalpyna keltirýge baǵyttalǵan jumystary qoldaýǵa laıyq, - dedi Qasym-Jomart Toqaev.

Aıta ketý kerek, quryltaıdyń paneldik sessııalary keshe bastalǵan. Ol sektsııalardyń taqyryptary azamattyq qoǵam, mádenıet, óner, rýhanııat, bilim jáne ǵylym, áleýmettik-ekonomıkalyq damý máselelerin qamtydy.