Memleket basshysy Électricité de France kompanııasynyń bas dırektory Lıýk Remondy qabyldady

PARIJ. KAZINFORM – Prezıdent Qasym-Jomart Toqaev Électricité de France kompanııasynyń bas dırektory Lıýk Remonmen kezdesý barysynda energetıka salasyndaǵy yntymaqtastyq perspektıvasyn talqylady.

Memleket basshysyna atom elektr stantsııalaryn basqaratyn álemdegi eń iri kompanııanyń qazirgi qyzmeti men jospary týraly málimet berildi.

Prezıdent jalpyulttyq referendým nátıjesinde Qazaqstan azamattarynyń basym bóligi elimizdegi alǵashqy atom elektr stantsııasynyń qurylysyna qoldaý bildirgenin aıtty. Frantsýz kompanııasy AES qurylysyna arnalǵan ıadrolyq tehnologııalardy áleýetti jetkizýshilerdiń qysqa tizimine enedi. Qasym-Jomart Toqaev elimizde osy mańyzdy jobany júzege asyrýdyń yqtımal modeli retinde halyqaralyq konsortsıým qurý múmkindigi qarastyrylyp jatqanyn atap ótti.

Lıýk Remon óz kezeginde «Qazatomónerkásip» kompanııasymen ózara tıimdi seriktestikti jalǵastyrýǵa nıetti ekenin rastady. Sondaı-aq jańartylatyn energııa kózderi salasyndaǵy perspektıvti jobalardy júzege asyrýǵa qatysty oıymen bólisti.

EDF – elektr qýatyn óndirýmen jáne taratýmen aınalysatyn Frantsııanyń memlekettik kompanııasy. Kompanııa 67 atom reaktoryn basqarady, onyń 56-sy – Frantsııada, 9-y – Ulybrıtanııada, 2-i Qytaıda ornalasqan (bul – álemde paıdalanylatyn atom elektr stantsııalarynyń jıyntyq qýatynyń shamamen 18 paıyzy). Kompanııa Frantsııada taǵy 14 reaktor salýdy josparlap otyr.