Memleket basshysy kúıshi Ábdimomyn Jeldibaevtyń týystaryna kóńil aıtty

ASTANA. KAZINFORM — Prezıdent Qasym-Jomart Toqaev dáýlesker kúıshi, kompozıtor, «Parasat», «Qurmet», «Dostyq» ordenderiniń ıegeri Ábdimomyn Jeldibaıulynyń dúnıeden ótýine baılanysty onyń otbasy men jaqyn týystaryna kóńil aıtty, dep habarlaıdy Aqordanyń baspasóz qyzmeti. 

— Ábdimomyn Jeldibaıuly kıeli kúı óneriniń kókjıegin keńeıtken daryn ıesi, ulaǵatty ustaz boldy. Bar sanaly ǵumyryn tól muramyzdy nasıhattaýǵa arnap, elimizdiń mádenıeti men rýhanııatyn damytýǵa aıryqsha eńbek sińirdi. «Erke sylqym» sııaqty ómirsheń kúılerimen jurtshylyqtyń yqylasyna bólendi. Ónegeli ómir súrip, sońyna mýzykalyq mol mura qaldyrǵan Ábdimomyn Jeldibaıulynyń jarqyn beınesi halqymyzdyń júreginde máńgi saqtalady. Marqumnyń ımany salamat, jany jánnatta bolsyn, — dep jazylǵan jedelhatta.

Aıta keteıik, belgili kúıshi-kompozıtor, Qazaqstannyń eńbek sińirgen óner qaıratkeri, kópshilikke ózi shyǵarǵan «Erke sylqym» kúıimen keń tanylǵan Ábdimomyn Jeldibaev 90 jasqa qaraǵan shaǵynda dúnıeden ozǵanyn jazǵan edik.