Memleket basshysy Kýveıttiń Taq muragerimen kezdesti

ASTANA. KAZINFORM - Qasym-Jomart Toqaev SOP29 Dúnıejúzilik klımat sammıti aıasynda Kýveıttiń Taq murageri, sheıh Sabah Halıd ál-Hamad As-Sabahpen kezdesý ótkizdi, dep habarlaıdy Aqorda.

Memleket basshysy Kýveıtti Qazaqstannyń arab álemindegi mańyzdy seriktesi retinde atap ótti.

Prezıdent eki el arasynda turaqty saıası dıalog pen ekonomıkalyq yqpaldastyq damyp kele jatqanyna nazar aýdaryp, Qazaqstannyń Kýveıtpen jan-jaqty yntymaqtastyqty odan ári nyǵaıtýǵa beıil ekenin rastady.

Sonymen qatar Qasym-Jomart Toqaev Kýveıttiń Qazaqstan ekonomıkasyna qarjy quıatyn iri ınvestordyń birine aınalýǵa áleýeti mol ekenine senim bildirip, elimizde birqatar Kýveıt kompanııasynyń tabysty jumys istep jatqanyn mysalǵa keltirdi.

Qasym-Jomart Toqaev pen sheıh Sabah Halıd ál-Hamad As-Sabah birlesken ınvestıtsııalyq jobalarǵa basa mán bere otyryp, saýda-ekonomıkalyq baılanystardy jandandyra túsý jóninde ýaǵdalasty.

Áńgimelesý barysynda kópjaqty qurylymdar aıasyndaǵy, sonyń ishinde Ortalyq Azııa – Shyǵanaqtaǵy arab memleketteriniń yntymaqtastyǵy keńesi formatyndaǵy yqpaldastyqqa basymdyq berildi.

Kezdesý sońynda Qasym-Jomart Toqaev Kýveıt Ámiri Mıshaal ál-Ahmad ál-Djaber As-Sabahty Qazaqstanǵa saparmen kelýge shaqyrdy.

Eske salaıyq, búgin Prezıdent Qasym-Jomart Toqaev Dúnıejúzilik klımat sammıtine qatysý úshin Bakýdegi olımpıadalyq stadıonǵa bardy. Sosyn Memleket basshysy Bakýdegi Dúnıejúzilik klımat sammıtinde sóz sóıledi. Klımattyń ózgerýi jónindegi BUU-nyń negizdemelik konventsııasyna qosylýshy taraptardyń 29-shy konferentsııasy aıasynda QR Prezıdenti Qasym-Jomart Toqaev Fınlıandııa Prezıdenti Aleksandr Stýbbpen kezdesý ótkizdi.