Memleket basshysy qutqarýshylarmen jáne eriktilermen kezdesti
ASTANA. KAZINFORM - Qasym-Jomart Toqaev Batys Qazaqstan oblysyna jumys sapary kezinde ishki ister organdary, Tótenshe jaǵdaılar departamenti, Ulttyq ulan qyzmetkerlerinen quralǵan qutqarýshylar tobymen jáne sý tasqynyna qarsy sharalarǵa belsendi qatysyp jatqan eriktilermen júzdesti, dep habarlaıdy Aqordanyń baspasóz qyzmeti.
Kezdesý barysynda Prezıdent tabıǵı apatpen kúreske atsalysqan barlyq azamatqa rızashylyǵyn bildirip, olar búkil elimiz úshin óte mańyzdy, ıgi is atqaryp júrgenin atap ótti.
– Kóp uzamaı bul jumystar da aıaqtalady. Qıyndyqty qalaı da eńseremiz. Osynda eńbek etip júrgen qutqarýshylar, polıtseıler, eriktiler laıyqty deńgeıde marapattalady. Bul mindetti túrde meniń baqylaýymda bolady, – dedi Qasym-Jomart Toqaev.
Buǵan deıin habarlaǵanymyzdaı, Memleket basshysy Qasym-Jomart Toqaev Batys Qazaqstan oblysyna jumys saparymen bardy. Prezıdent sapary qarǵyn sý basqan aýmaqtardy tikushaqpen aralap kórýden bastaldy. Qaratóbe aýdany ortalyǵyndaǵy Qajym Jumalıev atyndaǵy mektep-gımnazııa bazasynda ornalasqan evakýatsııalyq pýnktidegi turǵyndarmen kezdesti. Osy oraıda, «Prezıdentimiz Qasym-Jomart Kemeluly Toqaevtyń mektebimizge kelip, evakýatsııalanǵan turǵyndarmen kezdeskeni zor qýanysh ári demeý boldy», - dedi mektep dırektory Mırash Óteǵalıeva Kazinform tilshisine. Sondaı-aq Prezıdent Qasym-Jomart Toqaevtyń tóraǵalyǵymen tótenshe jaǵdaı jónindegi jedel shtabtyń otyrysy ótti.
BQO-da sý basqan aýmaqtardan 6 myńnan astam adam evakýatsııalanǵanyn, sý tasqynyna baılanysty kúrdeli jaǵdaı týyndaǵan jerlerge gýmanıtarlyq kómek jetkizilip jatqanyn jazǵan bolatynbyz. Sý tasqyny kezinde Batys Qazaqstan oblysynda ólgen mal sany 1500-den asty, shyǵyn qalaı ótelmek?
Aıta ketý kerek, Orynbor oblysyndaǵy Irıkla sý qoımasynan sekýndyna 1600 tekshe metr sý jiberilip jatyr. Bul týraly «Qazsýshar» RMK Batys Qazaqstan fılıalynyń basshysy Raýan Husaıynovqa Tómengi Edil basseındik sý basqarmasy Orynbor oblysy boıynsha sý resýrstary bóliminiń bastyǵy Sergeı Rıdel málim etti.
