Memleket basshysy kitap oqý mádenıetin damytý jónindegi Jarlyqqa qol qoıdy

Kitap oqý mádenıetin damytý jáne zerdeli ult qalyptastyrý jónindegi sharalar týraly

Adamı kapıtaldy damytý, qoǵamnyń zııatkerlik jáne mádenı áleýetin nyǵaıtý, bilim berý, tárbıeleý jáne oqý-aǵartý isiniń negizgi elementi retinde kitap oqý mádenıetin nasıhattaý, zerdeli ult qalyptastyrý, sondaı-aq shyǵarmashyl, jasampaz jáne básekege qabiletti tulǵany damytý úshin jaǵdaı jasaý maqsatynda QAÝLY ETEMІN:

1. Mynalar mádenıet, bilim berý jáne ınnovatsııalar salalaryndaǵy memlekettik saıasattyń basym baǵyttary bolyp aıqyndalsyn:

kitap oqý mádenıetin damytý jáne zerdeli ult qalyptastyrý;

oqyrmandarǵa arnalǵan zamanaýı ınfraqurylymdy damytý: tsıfrlyq quraldardy keńinen qoldana otyryp, jańa formattaǵy kitaphanalar, qoǵamdyq keńistikter qurý;

týyndylary jas urpaqty Qazaqstan Respýblıkasy Konstıtýtsııasynyń negizgi qaǵıdattary men erejelerin qurmetteý rýhynda tárbıeleýge yqpal etip júrgen otandyq jazýshylar men aqyndardy qoldaý;

baspagerler men kitap ónimin taratýshylardyń memleket úshin paıdaly qyzmetterin yntalandyrý;

ulttyq ádebı murany el ishinde jáne shetelde nasıhattaý.

2. Qazaqstan Respýblıkasynyń Úkimeti:

1) halyqtyń ártúrli sanattary, onyń ishinde balalar men jastar arasynda kitap oqý mádenıetin damytý jáne kitap oqýdyń ornyqty daǵdylaryn qalyptastyrý jónindegi sharalar keshenin iske asyrýdy qamtamasyz etsin;

2) jańa formattaǵy kitaphanalar, kópfýnktsıonaldy qoǵamdyq keńistikter qurýdy, zamanaýı aqparattyq júıeler men servıster endirýdi qosa alǵanda, oqyrman ınfraqurylymyn jańǵyrtýdy qamtamasyz etsin;

3) ulttyq ádebı murany el ishinde jáne shetelde nasıhattaýdy, onyń ishinde týyndylardy sapaly aýdarý, basyp shyǵarý, oqyrmandardyń keń aýqymdy aýdıtorııasyna taratý arqyly qamtamasyz etsin;

4) 2026 jylǵy 1 qyrkúıekke deıin «Jyldyń 10 oqyrmany» respýblıkalyq jobasyn iske asyrýǵa kirissin;

5) jasandy ıntellektini damytý jaǵdaıynda 2026 jyldyń sońyna deıin Kitap oqý mádenıetin jáne kitap isin nasıhattaýdyń 2027 – 2031 jyldarǵa arnalǵan «Zerdeli ult» tujyrymdamasyn (budan ári – «Zerdeli ult» tujyrymdamasy) bekitsin;

6) 2027 jylǵy 1 qańtarǵa deıin «Kitaphana jáne kitap shyǵarý isi týraly» Qazaqstan Respýblıkasynyń jańa Zańynyń jobasyn ázirlesin;

7) 2027 jylǵy 1 qańtarǵa deıin kitap oqý mádenıetin damytýdaǵy jetistikteri úshin Ulttyq syılyq taǵaıyndasyn;

8) 2027 jylǵy 1 qańtarǵa deıin biryńǵaı qoljetimdi Ulttyq tsıfrlyq kitaphana platformasyn qursyn;

9) jyl saıyn «Zerdeli ult» tujyrymdamasynyń iske asyrylý barysy týraly Qazaqstan Respýblıkasy Prezıdentiniń Ákimshiligine esep bersin.

3. Osy Jarlyq qol qoıylǵan kúninen bastap qoldanysqa engiziledi.

Qazaqstan Respýblıkasynyń

Prezıdenti Q.Toqaev

Astana, Aqorda, 2026 jylǵy 16 mamyr

№ 1279