Memleket basshysy Qostanaı oblysyndaǵy sý tasqynyna baılanysty jaǵdaımen tanysty
QOSTANAI. KAZINFORM — Soltústik Qazaqstan oblysynan keıin Prezıdent borty Qostanaı oblysyna ushyp keldi. Qasym-Jomart Toqaev óńirdegi qazirgi ahýalmen tanysý úshin tikushaqpen sý basqyn aýmaqtardy aralap kórdi. Bul týraly Aqordanyń baspasóz qyzmeti habarlady.
Oblys ákimi Qumar Aqsaqalov sý tasqynyna baılanysty óńirdegi alty aımaqta tótenshe jaǵdaı jarııalanǵanyn aıtty. Oblystaǵy 492 aýyldyń 11-i sý tasqynynan zardap shekti. Qazirgi kezde jaǵdaı turaqtaldy. Alaıda áli de 51 úı sý astynda qalyp otyr. Budan bólek, 4 kópirdi, 7 jol ýchaskesin sý shaıyp ketken, 1414 elektr baǵanyna nuqsan keldi. Nátıjesinde Qostanaı men oblystyń ońtústigindegi aýdandar arasynda kólik qatynasy qıyndap, 13 eldi mekendi elektrmen qamtamasyz etý máselesinde túıtkilder paıda boldy.
Sonymen qatar Prezıdentke oblystyń negizgi gıdrotehnıkalyq nysandarynyń, atap aıtqanda Qaratomar, Joǵarǵy Tobyl jáne Jelqýar sý qoımalarynyń jaı-kúıi jóninde málimet berildi. Qumar Aqsaqalov eldi mekender men ınfraqurylymdarǵa tónetin qaýiptiń aldyn alý úshin sý qoımalarynan jiberiletin sý mólsheri udaıy baqylaýda ustalatynyn aıtty.
Jalpy, óńirdegi dambalardy bekitý, ınertti materıaldardy tógý nátıjesinde Tobyl qalasyn, Amangeldi aýdanynyń ortalyǵyn jáne basqa da eldi mekenderdi sý basý qaýpinen saqtap qalý múmkin bolǵan.
Buǵan deıin habarlaǵanymyzdaı, Memleket basshysy Soltústik Qazaqstan oblysyna jumys saparymen bardy. Qasym-Jomart Toqaevtyń jumys sapary Sergeevka sý qoımasyn, Qyzyljar aýdanyn jáne Petropavl qalasynyń tóńiregin tikushaqpen aralap kórýden bastaldy. Sondaı-aq Prezıdent Petropavl sý torabynda boldy.
Búgin sondaı-aq memleket basshysy sapar barysynda tabıǵı apatpen kúresip júrgen azamattarǵa alǵys aıtqanyn jazǵan bolatynbyz.
