Memleket basshysy Koreıa Prezıdenti Lı Chje Meńmen telefon arqyly sóılesti

ASTANA. KAZINFORM — Memleket basshysy Qasym-Jomart Toqaev Koreıa Respýblıkasynyń Prezıdenti Lı Chje Meńmen telefon arqyly sóılesti. Bul týraly Aqorda málim etti. 

Áńgimelesý barysynda prezıdentter san qyrly qazaq-koreı yntymaqtastyǵyn odan ári nyǵaıtýǵa beıil ekenin rastady.

— Memleketter basshylary ekijaqty baılanystardyń barlyq baǵyty boıynsha egjeı-tegjeıli pikir almasty. Sondaı-aq saýda-ekonomıkalyq jáne mádenı-gýmanıtarlyq yqpaldastyqty jandandyrýǵa nıet bildirdi, — delingen habarlamada.

Taraptar ónerkásip, energetıka, mashına jasaý, bilim berý jáne medıtsına salalarynda qolǵa alynǵan ári perspektıvti jobalardy tıimdi júzege asyrýdyń mańyzyn atap ótti.

Lı Chje Meń Qazaqstan Prezıdentin Koreıa Respýblıkasyna resmı saparmen kelýge shaqyrdy.

Qasym-Jomart Toqaev Ońtústik Koreıa basshysynyń shaqyrýyn rızashylyqpen qabyl alyp, kelesi jyly Seýlde ótetin «Ortalyq Azııa — Koreıa Respýblıkasy» formatyndaǵy sammıtke qatysatynyn málimdedi.

Aıta keteıik, buǵan deıin Memleket basshysy Mysyr Prezıdentine quttyqtaý jedelhatyn joldaǵan bolatyn.