Memleket basshysy Ulttyq quryltaı otyrysy ótetin kúndi belgiledi
ASTANA. KAZINFORM — Ulttyq quryltaıdyń besinshi otyrysy 20 qańtar kúni Qyzylorda qalasynda ótedi. Bul týraly Aqordanyń baspasóz qyzmeti habarlady.
Memleket basshysy konstıtýtsııalyq reformaǵa qatysty túsip jatqan usynystarmen tanysty. Qasym-Jomart Toqaev Memlekettik keńesshi Erlan Qarınmen jáne Prezıdenttiń quqyqtyq máseleler jónindegi kómekshisi Erjan Jıenbaevpen Parlamenttik reforma boıynsha kezekti jumys keńesin ótkizdi.
Erlan Qarın Memleket basshysyna Jumys tobynyń 9 qańtarda ótken otyrysynda bolashaq bir palataly Parlamenttiń mártebesin, ókilettikteri men fýnktsııalaryn anyqtaýǵa, sondaı-aq bıliktiń basqa da tarmaqtarymen ózara is-qımylyna qatysty tásilder ázirlengenin aıtty.
15 qańtarǵa josparlanǵan kelesi otyrysta jańa Parlamenttiń basty memlekettik ınstıtýttardyń qyzmetin qamtamasyz etý ókilettikteri talqylanady.
Erjan Jıenbaev Memleket basshysyn konstıtýtsııalyq reformaǵa qatysty Jumys toby músheleri men jurtshylyqtan kelip túsken jańa usynystarmen tanystyrdy.
— Prezıdent barlyq pikir men bastamany eskerý qajet ekenin atap ótti. Sondaı-aq konstıtýtsııalyq reforma boıynsha túpkilikti sheshimdi el azamattary jalpyulttyq referendýmda qabyldaıtynyn málimdedi, — delingen habarlamada.
Sonymen qatar kezdesýde Ulttyq quryltaıdyń Qyzylorda qalasynda ótetin besinshi otyrysyna daıyndyq máselesi qaraldy.
Memleket basshysy Quryltaı otyrysyn ótkizýdi osy jyldyń 20 qańtaryna belgilep, aldaǵy mańyzdy is-sharany uıymdastyrý jáne oǵan tyńǵylyqty ázirlený jóninde naqty tapsyrma berdi.
Budan buryn Parlamenttik reforma jónindegi jumys tobynyń tórtinshi otyrysy ótkenin jazǵanbyz.