Memleket basshysy Qyzylordanyń damý qarqynyna jaqsy baǵa berdi

QYZYLORDA. KAZINFORM — Syr boıy naǵyz eńbek adamdarynyń mekeni. Bul týraly Memleket basshysy Qasym-Jomart Toqaev Qyzylorda qalasynda ótip jatqan Ulttyq quryltaıdyń V otyrysynda aıtty.

— Jalpy, «Syr eli — jyr eli» dep beker aıtylmaıdy. Qorqyt ata zamanynan jalǵasyp kele jatqan jyraýlyq-jyrshylyq jáne kúıshilik óner bul aımaqta keń qanat jaıǵan. Jıenbaı, Nurtýǵan, Nartaı syndy sańlaqtar negizinen qalaǵan jyrshylyq mektepterdi búkil elimiz biledi. Syr boıy naǵyz eńbek adamdarynyń mekeni. Keńes zamanynda osy aımaqtan júzge jýyq Eńbek Eri shyqqan. Áıgili kúrishshi – Ybyraı Jaqaevty halqymyz eren eńbektiń sımvolyna balaıdy. Aǵa býynnyń abyroıly jolyn búgingi urpaq laıyqty jalǵastyryp keledi, — dedi Prezıdent.

Memleket basshysy sońǵy jyldary Qyzylorda oblysy zaman talabyna saı ósip-órkendep jatqanyn aıtty.

— Byltyr aımaqtyń jalpy ishki ónimi 6,5 paıyzǵa ósti. 3 jylda oblysqa 2 trln teńgege jýyq ınvestıtsııa tartyldy. Byltyr 27 ınvestıtsııalyq joba júzege asyryldy. Sonyń ishinde jańa jylý elektr ortalyǵynyń iske qosylǵanyn erekshe atap ótken jón. Strategııalyq mańyzy bar bul nysan tolyǵymen ınvestordyń qarjysyna salyndy. Jylý elektr ortalyǵy aımaqtyń energetıkalyq qaýipsizdigin nyǵaıta túsedi. Oblys turǵyndary sapaly aýyz sýmen qamtamasyz etildi. Halyqtyń 80 paıyzy kógildir otyndy paıdalanady. Eldi mekenderge gaz qubyryn tartý jumysy aldaǵy ýaqytta jalǵasa beredi, — dedi Qasym-Jomart Toqaev.

Prezıdenttiń aıtýynsha, aımaqtaǵy avtokólik jolynyń sapasy jaqsy jaǵdaıda ekenin aıtty.

— Oblystyq áýe jáne temirjoly júıesi de jańǵyrtylyp jatyr. Qorqyt ata áýejaıynyń jańa termınaly ashyldy. Qyzylorda qalasyndaǵy tarıhı ǵımarattyń biri temirjol vokzaly kúrdeli jóndeýden ótti. Buǵan qosa, aımaqtaǵy 10 temirjol beketin jańǵyrtý bastaldy. Munyń bári oblystyń logıstıkalyq áleýetin arttyra túsedi, — dedi Prezıdent.

Aıta keteıik, V Ulttyq quryltaıdyń alǵashqy kúninde 200-den astam usynys aıtyldy.