Memleket basshysy Qytaıdyń jahandyq bastamasy jónindegi joǵary deńgeıdegi keńeske qatysty
NЬıÝ-IORK. KAZINFORM — Prezıdent Qasym-Jomart Toqaev BUU Bas Assambleıasynyń 80-shi sessııasy aıasynda QHR-dyń jahandyq damý jáne jahandyq basqarý salasyndaǵy bastamalary boıynsha joǵary deńgeıdegi keńeste sóz sóıledi. Bul týraly Aqordanyń baspasóz qyzmeti habarlady.
Іs-shara «Jahandyq damýdyń jarqyn keleshegin birlese qurý, bastapqy umtylystarǵa adaldyq» taqyrybyna arnaldy.
Memleket basshysy asa mańyzdy ári der kezinde uıymdastyrylǵan jıyn úshin Qytaı tarapyna rızashylyǵyn bildirdi.
— Biz QHR Tóraǵasy Sı Tszınpınniń kóregen basshylyǵy men anaǵurlym ádil, ınklıýzıvti ári tıimdi halyqaralyq yntymaqtastyq ornatýǵa baǵyttalǵan kúsh-jigerin joǵary baǵalaımyz. Osy oraıda Qazaqstan geosaıası jáne ekonomıkalyq syn-qaterlerge jaýap beretin Qytaıdyń jahandyq bastamasyn tolyǵymen quptaıdy, — dedi Prezıdent.
Qasym-Jomart Toqaev Ornyqty damý maqsattaryna tezirek jetýge yqpal etetin Jahandyq damý bastamasyna (Global Development Initiative) elimizdiń qoldaý kórsetetinin jetkizdi.
— Bul QHR Tóraǵasy Sı Tszınpınniń Tıantszınde ótken Shanhaı yntymaqtastyq uıymy sammıtindegi Qytaıdyń keıingi strategııalyq usynysyna — Jahandyq basqarý bastamasyna (Global Governance Initiative) saı keledi. Atalǵan bastama turlaýsyz álemge oń áser etip, kóptegen eldiń maqsat-muratyn aıqyn jetkizýine kómektesedi. Osy rette negizgi róldi Birikken Ulttar Uıymy atqaratyn bolady, — dedi Qasym-Jomart Toqaev.
Bul bastama egemendik teńdigin qamtamasyz etý, halyqaralyq quqyq ústemdigi, kópjaqty ınstıtýttardy nyǵaıtý, sondaı-aq adamdardyń ıgiligi men múddelerin qorǵaýǵa baǵyttalǵan álemdik tártipti ilgeriletý sekildi ózekti máselelerdiń sheshimin usynady.
— Jahandyq basqarý bastamasy, eń aldymen, tsıfrlyq tehnologııaǵa, qaýipsiz kıberkeńistikke jáne ǵarysh keńistigine ádil qol jetkizýdi qamtamasyz etedi. Bul normatıvtik-quqyqtyq baza men jasandy ıntellektini paıdalanýdyń etıkalyq standarttaryn ázirleý turǵysynan óte ózekti. Osy oraıda Qazaqstan Qytaıdyń Jasandy ıntellekt salasyndaǵy yntymaqtastyq boıynsha jahandyq uıym qurý jónindegi usynysyn qoldaıdy, — dedi Memleket basshysy.
Sondaı-aq Prezıdent Jahandyq basqarý bastamasy 150-den astam el qosylǵan «Bir beldeý, bir jol» strategııasynyń mindetterimen úndes ekenin jetkizdi.
Sóz sońynda Qasym-Jomart Toqaev jahandyq bastamany júzege asyrý aıasyndaǵy yntymaqtastyq BUU-nyń negizgi maqsattaryna jetýge septigin tıgizetinin atap ótti.
Aıta keteıik, Memleket basshysy Belgııamen uzaq merzimdi yntymaqtastyqty damytýǵa basa mán beretinin aıtty.
Sondaı-aq Fınlıandııa prezıdentimen ekijaqty jáne halyqaralyq máselelerdi talqylady.