Memleket basshysy Qyrǵyz Respýblıkasynyń Prezıdentine quttyqtaý jedelhatyn joldady
ASTANA. KAZINFORM - Qasym-Jomart Toqaev Prezıdent Sadyr Japarovty jáne qyrǵyz halqyn baýyrlas eldiń 2027-2028 jyldary BUU Qaýipsizdik Keńesiniń turaqty emes múshesi bolyp saılanýymen quttyqtady, dep habarlaıy Aqordanyń baspasóz qyzmeti.
– Bul aıtýly oqıǵa Qyrǵyzstan jáne tutas Ortalyq Azııa elderi úshin tarıhı mánge ıe. Qyrǵyz Respýblıkasy Prezıdentiniń basshylyǵymen júrgizilip otyrǵan jasampaz ári syndarly saıasattyń nátıjesinde Qyrǵyzstannyń halyqaralyq arenadaǵy bedeli joǵary deńgeıde tanyldy. Qazaqstan Qyrǵyz Respýblıkasynyń kandıdatýrasyn dáıekti túrde qýattady ári osy jaýapty mıssııany atqarýda aldaǵy ýaqytta jan-jaqty qoldaý kórsetýge daıyn. Qyrǵyzstannyń BUU Qaýipsizdik Keńesindegi jumysyna tabys tileımin! – dep jazylǵan jedelhatta.
Osyǵan deıin Qyrǵyzstannyń alǵash ret BUU Qaýipsizdik Keńesiniń múshesi bolyp saılanǵany týraly jazdyq.
