Memleket basshysy: Qınalǵan adamǵa kómek qolyn sozý – ultymyzdyń bolmysyna sińgen daǵdy
ASTANA. KAZINFORM - Prezıdent Qasym-Jomart Toqaev qutqarýshylarǵa memlekettik marapattar tapsyrý rásiminde Qasym-Jomart Toqaev memleket óz azamattaryna qaı jerde bolsa da kómek qolyn sozatynyn eske saldy, dep habarlaıd Aqordanyń baspasóz qyzmeti.
Memleket basshysy atap ótkendeı, bul qaǵıdattar Konstıtýtsııamyzda kórinis tapqan. Ata zańymyzda eń aldymen adam ómiri men qaýipsizdigin saqtaý, onyń quqyǵyn qorǵaý eń joǵary qundylyqtar retinde qarastyrylady.
Osy oraıda Prezıdent qaýipsizdik ár adamnyń jeke jaýapkershiliginen bastalatynyn alǵa tartyp, beıqamdyq pen salǵyrttyqty kez kelgen qoǵamdy artqa tartatyn qasıetter retinde atady.
– Degenmen apatqa kóbine adamdardyń ózi sebep bolatynyn moıyndaý kerek. Eger árkim ózine tapsyrylǵan jumysty tııanaqty oryndasa, apattardyń aldyn alyp, adamdardyń ómirin saqtaýǵa bolar edi. Keıbireýlerdiń nemquraıdylyǵy men salǵyrttyǵynyń saldary tym qymbatqa túsedi. Qoǵam qaýipsizdigi ár jannyń ishki tártibine baılanysty qalyptasady. Sondyqtan ejelden adam boıyndaǵy jınaqylyq, tártiptilik pen jaýapkershilik sekildi qasıetter joǵary baǵalanady. Tııanaqty, uqypty, jaýapkershiligi joǵary azamattar – órkenıetti jáne qaýipsiz qoǵamnyń arqaýy. Biz ozyq oıly ult bolamyz desek, óskeleń urpaqqa zańdy qurmetteý, tártipke baǵyný, tabıǵatty aıalaý qundylyqtaryn amanat etýimiz kerek. Bul qasıetter qoǵamdaǵy jańa etıkanyń aınymas ólshemi bolýǵa tıis. Qınalǵan adamǵa kómek qolyn sozý – ultymyzdyń bolmysyna sińgen daǵdy. Muny jaýapkershilik pen janashyrlyqtyń ozyq úlgisin kórsetip, beıbit kúnde eren erlik jasap júrgen azamattarymyz naqty isimen dáleldep júr. Memleket osyndaı adamdardy eshqashan nazardan tys qaldyrmaıdy, olarǵa laıyqty qurmet kórsetedi, – dedi Qasym-Jomart Toqaev.
Prezıdent sala mamandary ózderine júktelgen mindetti adal atqaryp, árdaıym el ıgiligi úshin qyzmet etip kele jatqanyn aıtty.
– Jurtymyz qutqarýshylardyń qajyrly eńbegine qashanda orasan zor qurmetpen qaraıdy, sizderdi joǵary baǵalaıdy. Búgin bizdiń ortamyzda aýyldyq jerlerde órt qaýipsizdigi ınfraqurylymyn damytýǵa eleýli úles qosqan azamattar da otyr. Bul shyn máninde áleýmettik jaýapkershiligi joǵary jáne otanshyl adamdarǵa tán áreket ekeni sózsiz, – dedi Memleket basshysy.
Aıta keteıik, Memleket basshysy osyǵan deıin Qazaqstanda jańa úlgidegi ásker jasaqtalatynyn aıtty.
