Memleket basshysy kezekten tys Prezıdent saılaýy ótedi degen qaýesetke qatysty pikir bildirdi
ASTANA. KAZINFORM — Memleket basshysy Qasym-Jomart Toqaev «Ana tili» gazetine bergen suhbatynda kezekten tys Prezıdent saılaýy ótedi degen qaýesetke qatysty pikir bildirdi.
– Áleýmettik jelide Siz 2026 jyly Birikken Ulttar Uıymyn basqarýyńyz múmkin, soǵan baılanysty elimizde kezekten tys Prezıdent saılaýy ótedi degen qaýeset tarap jatyr. Osy qaýesettiń negizi bar ma?
– Men Birikken Ulttar Uıymy bas hatshysynyń orynbasary jáne Qarýsyzdaný jónindegi konferentsııanyń bas hatshysy retinde osy uıymnyń Jenevadaǵy keńsesin úsh jylǵa jýyq basqardym. Halyqaralyq úderisterdiń qyr-syryna boılap, mol tájirıbe jınadym. Osynyń ózi artyǵymen jetedi dep oılaımyn. Meniń elimizdi damytýǵa qatysty talaı jylǵa arnalǵan aýqymdy josparlarym bar, onyń bárin júzege asyrýǵa nıettimin.