Memleket basshysy KazPan sendvıch-panelderin óndiretin zaýytty aralady
ASTANA. KAZINFORM — Qasym-Jomart Toqaevqa kásiporyn Kindus ońtústikkoreıalyq óndirisiniń joǵary tehnologııaly avtomattandyrylǵan jelisimen jabdyqtalǵany jóninde baıandaldy, dep habarlaıdy Aqordanyń baspasóz qyzmeti.
Zaýyt jylyna 1,8 mıllıon sharshy metrge deıin ónim shyǵara alady.
Munda zamanaýı jabdyqtarmen jáne tehnologııamen jumys isteý úshin Kindus-tyń ınjenerlerdi oqytý kýrsynan ótken 50 maman eńbek etedi. Búginde sendvıch-panelder ónerkásiptik, logıstıkalyq, ákimshilik, sporttyq jáne basqa da nysandardyń qurylysyn júrgizýde suranysqa ıe ekeni aıtyldy.
— Memleket basshysy eńbek ujymymen áńgimelesý barysynda zaýyttyń básekege qabilettiligin arttyrýǵa basymdyq beretinine jáne elimizdiń ınfraqurylymyn damytýǵa zor úles qosatynyna senim bildirdi, — delingen habarlamada.
Budan buryn Prezıdent Orbis Heavy Machinery arnaıy jáne kommertsııalyq tehnıka zaýytyna barǵanyn jazǵan edik.