Memleket basshysy «QazMunaıGaz» UK» AQ basqarma tóraǵasy Maǵzum Myrzaǵalıevti qabyldady

 ASTANA. KAZINFORM – Qasym-Jomart Toqaevqa Maǵzum Myrzaǵalıev kompanııanyń 2023 jylǵy operatsııalyq jáne qarjylyq qyzmetiniń qorytyndysy týraly esep berdi. Bul týraly Aqordanyń baspasóz qyzmeti málim etti. 

Berilgen málimetterge sáıkes, byltyr «QazMunaıGaz» 2022 jylmen salystyrǵanda negizgi óndiristik kórsetkishter boıynsha ósimge qol jetkizgen.

Prezıdentke Qazaqstan munaıynyń eksporttyq baǵyttaryn damytý isi jóninde baıandaldy. Atap aıtqanda, Germanııaǵa jáne Ázerbaıjan baǵytyna «Baký – Tbılısı – Djeıhan» munaı qubyry arqyly shıkizat jetkizile bastady. Sondaı-aq Birikken Arab Ámirlikterindegi seriktestermen birlesip, tanker flotyn keńeıtý jumystary júrgizildi.

Memleket basshysyna taýarlyq gaz óndirisin arttyrý jáne ishki naryqqa munaı ónimderin úzdiksiz jetkizýdi qamtamasyz etý, sondaı-aq ınvestıtsııa tartý, munaı-gaz hımııasy jobalaryn damytý jónindegi tapsyrmalarynyń oryndalý barysy jaıynda málimet berildi.

Sonymen qatar Maǵzum Myrzaǵalıev Kaspıı teńiziniń qazaqstandyq sektoryndaǵy «Qalamqas-teńiz, Hazar, Áýezov» teńiz jobasy men ulttyq kompanııanyń geologııalyq barlaý baǵdarlamasynyń qalaı júrip jatqanyn jetkizdi.

Budan bólek, Qasym-Jomart Toqaevqa «QazMunaıGaz» kompanııasynyń kásiporyndary ornalasqan óńirlerde júzege asyrylyp jatqan áleýmettik jobalar týraly aıtyldy. Máselen, Prezıdentke «Astrahan – Mańǵyshlaq» magıstraldy sý qubyryn qaıta jańǵyrtý jobasynyń aıaqtalǵany (I kezeń) jáne Mańǵystaý oblysy Jańaózen qalasynyń qajettiligi úshin jańa sý tushytý zaýytynyń qurylysy bastalǵany jóninde baıandaldy.

Kezdesý sońynda Memleket basshysy ınvestıtsııalyq jobalardy júzege asyrý, kómirsýtegi eksportynyń baǵyttaryndaǵy turaqtylyqty qamtamasyz etý jáne geologııalyq barlaý jumystarynyń aýqymyn keńeıtý jóninde birqatar naqty tapsyrma berdi. Prezıdent ulttyq kompanııanyń munaı-gaz hımııasyn damytýǵa baǵyttalǵan jumysyna erekshe mán berý qajet ekenin aıtty.