Memleket basshysy «QazMunaıGaz» UK AQ basqarma tóraǵasy Ashat Hasenovti qabyldady
ASTANA. KAZINFORM - Qasym-Jomart Toqaevqa ulttyq kompanııanyń 2025 jyly atqarǵan jumysy men bıylǵy mindetteri jóninde málimet berildi, dep habarlaıdy Aqordanyń baspasóz qyzmeti.
Ashat Hasenovtiń aıtýynsha, byltyr Qytaıdyń CNOOC jáne Sinopec kompanııalarymen Atyraý oblysyndaǵy Jylyoı jáne Batys Qazaqstan oblysyndaǵy Berezovskıı jobalary boıynsha jer qoınaýyn paıdalaný kelisimsharttary jasaldy. Turkish Petroleum Corporation, BP, Horvat kómirsýtegi agenttigi sekildi iri halyqaralyq kásiporyndar elimizdegi perspektıvti ýchaskelerdi zertteýde.
Prezıdentke «QazMunaıGaz» kompanııasy buǵan deıin keń kólemde zerttelmegen jáne jiti kóńil bólinbegen aýmaqtarda geologııalyq barlaý júrgizýge erekshe den qoıǵany jóninde baıandaldy. 2025 jyly 8 izdeý uńǵymasyn burǵylaý aıaqtaldy, al 2029 jylǵa deıin taǵy 24 izdeý uńǵymasyn burǵylaý josparlanǵan. Jalpy ınvestıtsııa kólemi 900 mıllıon dollardan asady.
Memleket basshysyna usynylǵan esepke sáıkes, 2025 jyldyń qorytyndysy boıynsha munaı men kondensat óndirý kólemi 26,2 mıllıon tonnaǵa jetti. Bul – 2024 jylmen salystyrǵanda 10 paıyzǵa joǵary. Budan bólek, kógildir otyn óndirý kólemin jylyna qosymsha 2,3 mıllıard tekshe metrge ulǵaıtý úshin Batys Prorva, Ortalyq Óriktaý jáne Rojkov ken oryndarynda jumys júrgizilip jatyr.
Byltyr «QazMunaıGazdyń» úsh munaı óńdeý zaýytynda 17,5 mıllıon tonna shıkizat óńdeldi. Jeńil munaı ónimderin shyǵarý kólemi 13,6 mıllıon tonnany qurady (2024 jylǵy kórsetkishten 1,2 mıllıon tonnaǵa artyq).
Sondaı-aq Qasym-Jomart Toqaev munaı-gaz hımııasy men gaz óńdeý salasyndaǵy jalpy quny 15 mıllıard dollardan asatyn iri ınvestıtsııalyq jobalardy iske asyrý barysymen tanysty. Mańǵystaý oblysynda qýaty táýligine 50 myń tekshe metr bolatyn «Kendirli» teńiz sýyn tushytý zaýyty paıdalanýǵa berildi.
Kezdesý sońynda Memleket basshysy geologııalyq barlaý jumystaryn jandandyrýǵa jáne iri ınvestıtsııalyq jobalardy ýaqtyly iske asyrýǵa qatysty mindet júktedi.
Aıta keteıik, osyǵan deıin Prezıdent kúzet qyzmetine qatysty qujatty maquldady.