Memleket basshysy Kazinform aqparat agenttigin 105 jyldyǵymen quttyqtady
ASTANA. KAZINFORM – Prezıdent ortalyǵynda Kazinform halyqaralyq aqparat agenttiginiń 105 jyldyǵyna arnalǵan saltanatty shara ótti.
Memleket basshysy Qasym-Jomart Toqaev agenttik ujymyna quttyqtaý hat joldady, ony Prezıdenttiń kómekshisi – Baspasóz hatshysy Rýslan Jeldibaı oqyp berdi.
– Ǵasyrdan astam tarıhy bar agenttik osy kezeńde elimizdiń aqparat salasyn damytýǵa ólsheýsiz úles qosty. Jurtshylyqty dúnıe júzindegi asa mańyzdy oqıǵalardan der kezinde habardar etip, Qazaqstannyń júz jyldyq jylnamasyn jazdy. Shejireli shańyraqta qoltańbasy qalǵan qalamgerler ult múddesin bárinen bıik qoıyp, halyqqa qaltqysyz qyzmet etti, – delingen quttyqtaýda.
Prezıdent redaktsııa ujymy qazir de bul ustanymnan aınymaı, aǵa býyn salǵan sara joldy laıyqty jalǵastyryp, qoǵamdaǵy kókeıkesti máselelerdi únemi batyl kóterip júrgenin atap ótti.
– Búginde agenttik birneshe tilde jańalyq taratatyn beldi halyqaralyq aqparat quralyna aınaldy. Álemdik basylymdardyń Kazinform málimetterine júginýi – sonyń aıqyn dáleli, – dep jazdy Qasym-Jomart Toqaev.
Memleket basshysy quttyqtaýynda Ádiletti Qazaqstandy qurý isine belsene atsalysyp, óz mindetin abyroımen atqaryp júrgen agenttik qyzmetkerlerine shynaıy rızashylyǵyn bildirdi.