Memleket basshysy «Qazaqtelekom» AQ basqarma tóraǵasy Baǵdat Mýsındi qabyldady
ASTANA. KAZINFORM – Qasym-Jomart Toqaevqa kompanııanyń qyzmeti men sońǵy eki jylda júzege asyrǵan negizgi ınfraqurylymdyq jáne tehnologııalyq jobalarynyń qorytyndylary jóninde baıandaldy, - dep habarlaıdy Aqordanyń baspasóz qyzmeti.
Búginde «Qazaqtelekom» 1,75 mıllıonnan astam úı sharýashylyǵyna qyzmet kórsetedi. Kompanııa el aýmaǵynda talshyqty-optıkalyq jelini júıeli túrde keńeıtip, telekommýnıkatsııa naryǵynyń negizgi segmentterinde kóshbasshylyq ornyn saqtap otyr.
Eldi mekenderdi baılanyspen qamtý boıynsha aýqymdy jumys jalǵasýda. 2027 jyldyń sońyna deıin 1 mıllıonnan astam turǵyny bar 3 myńnan asa aýyldy sapaly baılanys qyzmetimen qamtamasyz etý josparlanǵan.
Memleket basshysyna «Kaspıı TOBJ» halyqaralyq jobasynyń júzege asyrylýy týraly aqparat berildi. Atalǵan joba Aqtaý – Sýmgaıt baǵytynda sýasty talshyqty-optıkalyq baılanys jelisin salýdy kózdeıdi. Bul bastama Qazaqstannyń tranzıttik áleýetin arttyryp, Eýropa men Azııa arasynda tsıfrlyq dáliz qalyptastyrmaq.
Kezdesý barysynda derekterdi óńdeý ınfraqurylymyn damytý máselesine erekshe nazar aýdaryldy. Ekibastuz qalasynda «Derekterdi óńdeý ortalyǵy alqaby» strategııalyq jobasy aıasynda qýaty kezeń-kezeńimen ulǵaıtylatyn zamanaýı ortalyq qurylýda. Bul joba halyqaralyq tehnologııalyq kompanııalardy tartýǵa jáne eldiń ınvestıtsııalyq tartymdylyǵyn arttyrýǵa jol ashady.
Baǵdat Mýsınniń aıtýynsha, jasandy ıntellekt tehnologııalaryn engizýge basymdyq beriledi. Korporatıvtik protsesterdi avtomattandyrýǵa arnalǵan JI-agentterdi ázirleý, kıberqaýipsizdik sheshimderin jetildirý jáne memlekettik sektordy tsıfrlandyrý boıynsha birqatar joba qolǵa alyndy.
Qasym-Jomart Toqaev shaǵyn qalalar men aýyldardy sapaly baılanyspen jáne ınternetpen qamtýdyń mańyzyna nazar aýdardy. Prezıdent tsıfrlandyrý men jasandy ıntellektini damytý salalarynda ınvestıtsııalyq jobalardy ýaqtyly júzege asyrýdy tapsyrdy.
Osyǵan deıin Qasym-Jomart Toqaev birqatar memlekettiń elshilerinen senim gramotalaryn qabyldady.
