Memleket basshysy Qazaqstannyń Palestına memlekettiligin qoldaý ustanymyn rastady
ASTANA. KAZINFORM — Qasym-Jomart Toqaev Palestına Memleketiniń Joǵary sýdıasy, Prezıdenttiń din isteri jónindegi keńesshisi Mahmud ál-Habbashty qabyldady, dep habarlaıdy Aqordanyń baspasóz qyzmeti.
Memleket basshysy meımanǵa iltıpat bildire otyryp, dıplomatııalyq qatynas ornaǵan sátten beri Qazaqstan men Palestına arasyndaǵy yntymaqtastyq dostyq, ózara qoldaý jáne qurmet sıpatynda damyp kele jatqanyna nazar aýdardy.
Prezıdenttiń aıtýynsha, Qazaqstan Palestınany halyqaralyq qaýymdastyqtyń tolyq múshesi retinde tanýǵa baǵyttalǵan bastamalardy dáıekti túrde qoldap keledi.
Bul rette Qasym-Jomart Toqaev elimizdiń Taıaý Shyǵystaǵy ahýaldy dıplomatııalyq jolmen retteý, BUU Jarǵysy men halyqaralyq quqyq normalaryna sáıkes «Qos halyq úshin eki memleket» formýlasy negizinde Palestına memleketin qurý ustanymyn jaqtaıtynyn málimdedi.
Mahmud ál-Habbash Memleket basshysyna Palestına Prezıdenti Mahmud Abbas joldaǵan hatty tabystady.
Sondaı-aq elimizdiń Palestına halqyna jáne onyń beıbit ári jarqyn keleshekke umtylysyna udaıy qoldaý kórsetkeni úshin rızashylyǵyn jetkizdi.
Onyń pikirinshe, Qazaqstan Palestına úshin baýyrlas memleket sanalady. Bul ekijaqty baılanystardan, kópjaqty formattaǵy, eń aldymen, BUU men Islam yntymaqtastyǵy uıymy aıasyndaǵy qatynastardan kórinedi.
Kezdesý sońynda Qasym-Jomart Toqaev Prezıdent Mahmud Abbasqa izgi sálemin joldap, ony aldaǵy ýaqytta Qazaqstanǵa resmı saparmen kelýge shaqyrdy.
Budan buryn Prezıdent «Samuryq-Qazyna» basshysyn qabyldap, qor jumysyna qatysty tapsyrma bergenin jazǵanbyz.