Memleket basshysy: Qazaqstanǵa keletin mamandardyń shyqqan teginen qabileti mańyzdy
ASTANA. KAZINFORM — Qasym-Jomart Toqaev Qazaqstan-Belgııa iskerlik keńesiniń tórtinshi otyrysynda Qazaqstan ónimdilikti arttyrýǵa, aýyl sharýashylyǵy ónimderin qaıta óńdeýge, sondaı-aq sý jáne jer resýrstaryn tıimdi paıdalanýǵa basa mán beretinin aıtty, dep habarlaıdy Aqordanyń baspasóz qyzmeti.
Budan bólek, Prezıdent medıtsına men farmatsevtıka salalaryndaǵy seriktestikti nyǵaıtýdyń mańyzyna nazar aýdardy.
— Biz IBA kompanııasymen yntymaqtastyqty quptaımyz. Bul Qazaqstandaǵy protondy terapııaǵa qoljetimdilikti arttyrady. Sala mamandaryn daıarlaýǵa jáne klınıkalyq zertteýler júrgizýge qatysty birlesken baǵdarlama onkologııalyq aýrýlardy emdeýdiń ozyq tásilderi boıynsha quzyretimizdi nyǵaıtýǵa múmkindik beredi. Belgııanyń farmatsevtıkalyq kompanııalaryn elimizde óndiris oryndaryn ashýǵa shaqyramyz, — dedi Qasym-Jomart Toqaev.
Sondaı-aq Memleket basshysy Qazaqstan óz azamattarymen birge jumys isteı alatyn ozyq oıly ári isker tulǵalardy tartýǵa múddeli ekenin aıtty.
— Mundaı mamandar elimizge neǵurlym kóp kelse, soǵurlym barshamyzǵa paıdaly bolar edi. Óıtkeni osy arqyly adamdar arasyndaǵy qarym-qatynas jaqsaryp, kásibı baılanys jandana túsedi. Halqymyz osyndaı aralas-quralastyqty baǵalaıdy. Qazaqstan Prezıdenti retinde men úshin elimizge keletin azamattardyń shyqqan tegi emes, eń aldymen, qarym-qabileti men aqyl-oıy mańyzdy, — dedi Prezıdent.
Budan buryn Qasym-Jomart Toqaev Qazaqstan-Belgııa iskerlik keńesiniń tórtinshi otyrysynda energetıka jáne munaı hımııasy salalaryndaǵy yntymaqtastyq perspektıvasyna basa nazar aýdarǵanyn jazǵanbyz.
