Memleket basshysy: Qazaqstanda zań men tártip ústemdik qurýy qajet
ASTANA. KAZINFORM — Prezıdent halyq múddesi jolyndaǵy reformalardy tabysty jalǵastyrý úshin el ishinde beıbitshilik pen turaqtylyq bolýy qajet ekenin alǵa tartty, dep habarlaıdy Aqordanyń baspasóz qyzmeti.
Budan bólek, Qasym-Jomart Toqaev elimizdiń etnosaralyq jáne dinaralyq kelisim saıasatyna jáne «Birligimiz — áralýandyqta» qaǵıdatyna beıil ekenin málimdedi.
— Halyq múddesi jolyndaǵy reformalardy tabysty jalǵastyrý úshin el ishinde beıbitshilik pen turaqtylyq bolýy qajet. Qazaqstanǵa jamandyq tilep, is-áreketi arqyly zııan keltirýge tyrysatyn kez kelgen adam «Zań jáne tártip» qaǵıdatyna sáıkes jaýapqa tartylýǵa tıis ári solaı bolady. Elimizde zań men tártip ústemdik qurýy qajet. Qazaqstan — beıbit memleket. Biz beıbitshilik pen qaýipsizdikti nyǵaıtýǵa úles qosý úshin kórshiles memlekettermen, sondaı-aq osyǵan múddeli álemdegi iri nemese shaǵyn elderdiń barlyǵymen yntymaqtastyqty nyǵaıta beremiz, — dedi Memleket basshysy.
Qasym-Jomart Toqaev Qarmet kompanııasynyń myqty óndiristik bazasy «Halyqtyq qurylysta» zor ról atqaratynyna senim bildirdi.
— Qazirdiń ózinde Qazaqstannyń temiri qurylysta jáne ónerkásipte keńinen qoldanylady. Ony tutyný kólemi arta berýge tıis. Kombınat ónimi Saran qalasynda jolaýshylar avtobýsyn shyǵarýǵa paıdalanylady. Jańa quıý-ılemdeý kesheni boı kóterip jatyr. Munda keleshekte bolattyń munaı, atom jáne mashına jasaý ónerkásibinde suranysqa ıe óte sapaly túrleri shyǵarylady, — dedi Prezıdent.
Buǵan deıin Memleket basshysy Qarmet konverter tsehynyń jumysymen tanysqanyn jazǵanbyz.
