Prezıdent: Qazaqstan men Sıngapýr kóptegen salada ózara tıimdi yqpaldastyq jasaı alady

ASTANA. KAZINFORM - Memleket basshysy Qazaqstan men Sıngapýr kóptegen salada ózara tıimdi yqpaldastyq jasaı alady dep sanaıdy. Klımattyń ózgerýimen kúres, sý resýrstaryn basqarý jáne jahandyq azyq-túlik qaýipsizdigin qamtamasyz etý áreketteri osy sanatqa jatady, dep habarlaıdy Aqordanyń baspasóz qyzmeti. 

– Qazaqstannyń Almatyda Ortalyq Azııa elderiniń klımat jáne jasyl energetıka máseleleri jónindegi jobalyq keńsesin ashý bastamasy bul máselelerdi sheshýde eleýli ról atqara alar edi. Biz sondaı-aq 2026 jyly BUU aıasynda Óńirlik klımat sammıtin ótkizýdi josparlap otyrmyz. Klımat daǵdarysyna sebepshi bolatyn da, aldymen onyń zardabyn tartatyn da – sý salasy. Álemde 2 mıllıardtan astam adamnyń taza aýyzsýǵa qoly jetpeı otyr. Osy rette men Sý ekonomıkasy jónindegi jahandyq komıssııanyń teń tóraǵasy retinde kóshbasshylyq tanytqany úshin Prezıdent Tarman Shanmýgaratnamǵa rızashylyǵymdy bildiremin. Ol bıylǵy BUU konferentsııasy sheńberinde Qazaqstan men Frantsııa uıymdastyratyn One Water Summit jıynyna eleýli úles qosatynyna senimdimin, – dedi Prezıdent.