Memleket basshysy Qazaqstan men Grýzııa arasynda «jol kartasyn» ázirleýdi usyndy

Bul týraly Prezıdent Grýzııa Premer-mınıstri Iraklıı Kobahıdzemen kelissóz barysynda aıtty, dep habarlaıdy Aqordanyń baspasóz qyzmeti.

Qasym-Jomart Toqaev pen Iraklıı Kobahıdze ózara tıimdi ınvestıtsııalyq jobalardy júzege asyrýǵa múddeli ekenin rastady.

Atap aıtqanda, Transkaspıı halyqaralyq kólik baǵdarynyń negizgi qatysýshylary retinde eki el kólik-logıstıka ınfraqurylymyn damytý, konteınerlik tasymal kólemin keńeıtý, tarıf saıasatyn úılestirý jáne tsıfrlandyrýdy údetý baǵytynda dáıekti sharalar qabyldaýǵa nıetti.

Sońǵy bes jylda Orta dáliz arqyly tasymal kólemi 3,5 ese ósken. 2029 jylǵa qaraı atalǵan baǵdar boıynsha qatynaıtyn konteınerlik poıyzdar sany 3 myńǵa jetedi dep kútilýde.

Qazaqstan Batýmı portynan bólek, Grýzııanyń basqa da teńiz aılaqtaryna kirýge múddeli. Ótken jyly qazaqstandyq ınvestordyń qatysýymen Potı portynda jańa mýltımodaldi termınal ashyldy. Anaklııa porty – óńiraralyq baılanysty nyǵaıtý turǵysynan qyzyqty jobanyń biri sanalady.

Tsıfrlandyrý men jasandy ıntellekt ózara yntymaqtastyqtyń perspektıvti salalarynyń qatarynda ataldy.

Eki el tsıfrlyq úkimet, onlaın memlekettik qyzmetter jáne GovTech sheshimder baǵytynda tájirıbe almasýǵa daıyn ekenin rastady.

Qazaqstan Grýzııa startaptary men tehnologııalyq kompanııalarynyń Astana Hub baǵdarlamasyna jáne aımaqtyq tehnologııalyq bastamalarǵa qatysýyn quptaıdy.

Budan bólek, áńgimelesý barysynda densaýlyq saqtaý, bilim berý, mádenıet jáne týrızm salalaryndaǵy seriktestikti nyǵaıtý máselesine aıryqsha nazar aýdaryldy.

Prezıdent Grýzııanyń qazaqstandyq týrıster úshin tanymal baǵyttardyń biri sanalatynyn atap ótip, elimiz de grýzııalyq meımandardy qushaq jaıa qarsy alýǵa daıyn ekenin aıtty.

Sonymen qatar Memleket basshysy mádenı almasýlardy qoldaýdyń mańyzyna mán berip, eki eldiń mádenıet kúnderin uıymdastyrýdy usyndy.

Osyǵan deıin Qazaqstan men Grýzııa strategııalyq seriktestikti jańa deńgeıge kóteretini týraly jazdyq.