Memleket basshysy «Qazaqstan halqyna» qorynyń tóraǵasy Bolat Jámishevti qabyldady
ASTANA. KAZINFORM — Prezıdent Qasym-Jomart Toqaevqa qordyń osy ýaqytqa deıin atqarǵan qyzmeti men aldaǵy kezeńge arnalǵan mindetteri týraly aqparat berildi.
Bolat Jámishevtiń aıtýynsha, «Qazaqstan halqyna» qory úsh jylda jalpy somasy 230 mıllıard teńge bolatyn 103 qaıyrymdylyq jobasyn qarjylandyrdy. Onyń ishinde 58 joba tolyǵymen aıaqtaldy. Qordyń qyzmeti ashyqtyq, eseptilik jáne turaqtylyq qaǵıdattaryna negizdelgen. 2023 jyldyń qorytyndysy boıynsha Ernst&Young kompanııasy syrtqy aýdıt júrgizdi.
Memleket basshysyna qordyń densaýlyq saqtaý salasyna, atap aıtqanda, aýyr jáne sırek kezdesetin syrqatqa shaldyqqan naýqastardy dári-dármekpen qamtamasyz etýge erekshe mán beretini jóninde baıandaldy. Osy maqsatta 461 adamǵa, sonyń ishinde 342 balaǵa 57,7 mıllıard teńge bólingen. Qaterli isikke dýshar bolǵan 1200-den astam adamǵa quny 14,5 mıllıard teńge bolatyn arnaýly preparattar berilgen. Bes onkologııalyq ortalyq pen balalarǵa qyzmet kórsetetin 22 neırohırýrgııa bólimshesine zamanaýı qural-jabdyqtar satyp alyndy. Balalar múgedektiginiń aldyn alýǵa arnalǵan 13 erte aralasý ortalyǵyn ashý josparlanǵan bolatyn. Búginde osy maqsattaǵy 10 nysan qyzmet kórsete bastady.
Áleýmettik qoldaý baǵytynda aýtızm belgileri bar balalarǵa arnalǵan 7 ortalyq, sondaı-aq óńirlerde 6 ońaltý ortalyǵy paıdalanýǵa berildi. Aldaǵy ýaqytta taǵy 20 ortalyq iske qosylady. 150 adam ınnovatsııalyq protezben qamtyldy.
Tirek mektepterdiń áleýetin damytý jobasy aıasynda 135 aýyl mektebi jańǵyrtyldy. Almaty oblysyndaǵy 50 mektepte jáne Qaraǵandy oblysyndaǵy 86 bilim oshaǵynda fızıka, hımııa, bıologııa sabaqtaryna arnalǵan zamanaýı kabınetter jabdyqtaldy. Qordyń bilim berý granttaryna 3 myńnan astam stýdent ıe boldy. Aqtóbe oblysynda 134 shaǵyn jınaqty mekteptiń materıaldyq-tehnıkalyq bazasy jańaryp, tsıfrlyq tehnologııalar arqyly oqytýdyń tórt modeli engizildi.
Mádenıet pen sport salasynda Batys Qazaqstan oblysynyń kitaphanalaryn komıýnıtı ortalyq retinde qaıta qurý jáne 13 modýldi sport zalyn salý jumystary qolǵa alyndy. Eldi mekenderdegi 100 balalar sport zaly jabdyqtaldy.
Bolat Jámishevtiń aıtýynsha, qor tasqynnan zardap shekken jandarǵa qoldaý kórsetip, bes oblystaǵy 627 úıdiń qurylysyn qarjylandyrdy.
«Shaǵyn qalalar – úlken múmkindikter» áleýmettik bastamasy aıasynda iri kásiporyndardyń jáne bıznestiń qoldaýymen monoqalalardyń ınfraqurylymyn jaqsartý baǵdarlamasyn ázirleý josparlanyp otyr.
Qasym-Jomart Toqaev «Qazaqstan halqyna» qorynyń jumysyn joǵary baǵalap, qaıyrymdylyq sharalarynyń Qazaqstandaǵy azamattyq qoǵamnyń damýy men áleýmettik turaqtylyǵyn nyǵaıtýdaǵy mańyzyn atap ótti.