Memleket basshysy Qazaqstan halqyn Naýryz meıramymen quttyqtady
ASTANA. KAZINFORM — Qasym-Jomart Toqaev «Expo» kórme ortalyǵyndaǵy etnoaýylda Naýryz merekesin jurtshylyqpen birge qarsy aldy.
Prezıdent merekelik is-sharaǵa jınalǵan kópshilikti Naýryz meıramymen quttyqtap, jyly lebizin jetkizdi.
– Ulystyń uly kúni – ultymyzdyń ulyq meıramy. Bul – bizdiń ata dástúrimiz. Shýaqty kóktem merekesinde búkil dúnıe qaıta jańǵyrady. Kún men tún teńeledi. Qazaq eli áz-Naýryzdy kóne zamannan beri toılap keledi. Naýryz – eń aldymen, ıgilikti isterdiń merekesi. Osy kúnderi ár úıde aq dastarhan jaıylady. El-jurt bir-birimen qaýyshyp, aq tilegin aıtady. Muqtaj jandarǵa qaıyrymdylyq jasap, qamqorlyq kórsetedi. Ulystyń uly kúni bıyl da qasıetti Oraza aıymen tuspa-tus kelip otyr. Elimiz úshin munyń mán-mańyzy zor. Sebebi bizdiń dinimiz ben dástúrimiz – egiz. Qos qazynamyz halqymyzdyń biregeı bolmysyn aıshyqtaı túsedi, – dedi Qasym-Jomart Toqaev.
Prezıdent Naýryz merekesi byltyrdan bastap jańa tujyrymdamaǵa sáıkes on kún boıy atalyp ótetinine nazar aýdaryp, Naýryznamanyń ár kúni taǵylymǵa toly ekenin aıtty.
– Naýryz – kóptegen shyǵys halyqtaryna ortaq mereke bolǵanymen, elimizde Ulystyń uly kúnin toılaýdyń erekshe dástúri bar. Bul meıramnyń tól mádenıetimizdegi orny aıryqsha. Sheteldik meımandar da mereke qarsańynda Qazaqstanǵa arnaıy kelip, bizdiń salt-dástúrimizben tanysady, ádet-ǵurpymyzdy tanyp-biledi. Biz osy rýhanı qazynamyzdy jan-jaqty dáripteýimiz kerek. Naýryznama boıynsha búgin – Yntymaq kúni. Elimiz úshin aýyzbirshilik pen tatýlyqtyń orny qashanda erekshe. Búkil halqymyz ultyna, dinine qaramastan bir el bolyp, Naýryzdy birge atap ótedi. Biz osyndaı bereke-birligimizdiń arqasynda bolashaqqa zor senimmen qarap, tek alǵa qaraı qadam basyp kelemiz. Jan-jaqty reforma jasap, memlekettiń saıası júıesin jańǵyrtyp jatyrmyz. Aýqymdy ekonomıkalyq jobalardy qolǵa aldyq. Baısaldy syrtqy saıasatymyzdyń arqasynda Qazaqstan búkil álemge bedeldi memleket retinde tanymal boldy, – dedi Memleket basshysy.
Qasym-Jomart Toqaev Naýryz meıramynyń tazalyq, eńbekqorlyq qundylyqtaryn dáripteıtin tárbıelik mánine toqtaldy.
– Ulystyń uly kúni – tazalyq merekesi. Halqymyz osy kúni tal egip, bulaqtyń kózin ashqan. Aınalasyn tazalap, tabıǵatty aıalaǵan. Bul dástúr búgin de óz jalǵasyn tabýda. Byltyrdan beri elimizde «Taza Qazaqstan» aktsııasy júrip jatyr. Jalpyulttyq iske barsha jurtymyz, ásirese, jastar belsendi atsalysýda. Osylaısha qoǵamymyzda jańa ekologııalyq mádenıet pen bolmys qalyptasyp keledi. Naýryz – naǵyz eńbek merekesi. Kóktemniń basy – dala eńbegi jandanatyn kezeń. Qazir aýyl sharýashylyǵynda qarqyndy jumys bastaldy. Biz osy jyldy «Jumysshy mamandyqtary jyly» dep jarııaladyq. Basty maqsatymyz – eńbek adamynyń bedelin arttyrý. Óıtkeni eńbekqorlyq – ozyq oıly ultqa tán qasıet, – dedi Memleket basshysy.
Prezıdent búkil álemniń almaǵaıyp jaǵdaıda ómir súrip jatqan shaǵynda qoǵamnyń turaqtylyǵyn nyǵaıtý saıasatymyzdyń basty baǵyty bolyp qala beretinin aıtty.
– Bıyl Konstıtýtsııamyzǵa jáne Qazaqstan halqy Assambleıasyna 30 jyl tolady. Sondaı-aq Uly Jeńistiń 80 jyldyǵyn atap ótemiz. Kóp uzamaı qasterli Táýelsizdigimizdiń 40 jyldyq mereıli belesine jetemiz. Qazaqstan osy ýaqytta ozyq, órkenıetti, qýatty memleket bolýy kerek. Men Ulttyq quryltaıdyń Býrabaıdaǵy jıynynda osy máselege arnaıy toqtaldym. Biz elimizdi jańa jahandyq jaǵdaıǵa beıimdeýimiz qajet. Memleketimizdiń baǵdary da, basymdyǵy da – aıqyn. Tsıfrlandyrý isi men jasandy ıntellekt, iri ınfraqurylymdyq jobalar, kólik tasymaly jáne energetıka, agroónerkásip kesheni, sondaı-aq adam kapıtaly – osynyń bári elimizdiń negizgi damý baǵyttary. Qazaqstan osy salalar boıynsha álemdik básekege qabiletti el bolmaq. Buǵan bizdiń múmkindigimiz tolyq jetedi. Biz «Zań men tártip» qaǵıdasy berik ornyqqan, ádiletti, qaýipsiz, taza, mádenıetti jáne damyǵan Qazaqstandy mindetti túrde birge quramyz! Qazaqstannan basqa elimiz joq. Sondyqtan bárimiz bir qoǵam bolyp memleketimizdi nyǵaıtaıyq, damytaıyq, kórkeıteıik! – dedi Qasym-Jomart Toqaev.
Budan keıin Memleket basshysy jurtshylyqpen birge merekelik kontsertti tamashalady.
Aıta keteıik, Prezıdent sý tasqynyna qarsy sharalarǵa basa nazar aýdarýdy tapsyrdy.