Memleket basshysy Qazaqstan etnostary teatrlarynyń festıvalin ótkizýdi usyndy

ASTANA. KAZINFORM – Prezıdent Qasym-Jomart Toqaev Qazaqstan halqy Assambleıasynyń HHHІV sessııasynda etnos teatrlarynyń festıvalin ótkizýdi usyndy.

- Úshinshiden, «Birligimiz – áralýandyqta» qaǵıdatyn júzege asyrý úshin mádenıet pen ónerdiń áleýetin tolyq paıdalanǵan durys. Aleksandr Pýshkın, Taras Shevchenko, Fedor Dostoevskıı, Mıhaıl Sholohov jáne basqa da tulǵalardyń mýzeıleri – Qazaqstan mádenıetiniń baǵa jetpes qazynasyn tolyqtyryp tur. Bul mýzeılerdi kópshilikke tanytý úshin ekspozıtsııalaryn Astana men Almatyda uıymdastyrý mańyzdy. Keıbir etnomádenı birlestikter biregeı óner jáne etnografııalyq jeke kollektsııalardy jınady. Bul da elimizdiń mádenı murasyna aınalýǵa tıis. Qazaqstanda 9 orys drama teatry tabysty jumys istep jatyr. Sondaı-aq erekshe tórt etnos teatry, ıaǵnı, uıǵyr, koreı, ózbek jáne nemis teatrlary kórermenniń kózaıymy bolyp júr. Assambleıanyń 30 jyldyǵy aıasynda Almatyda báriniń basyn qosyp, Qazaqstan etnostary teatr óneriniń festıvalin ótkizsek bolady. Halyq kóp keledi dep oılaımyn, - dedi Qasym-Jomart Toqaev.

Sondaı-aq, Prezıdent Natalıa Dýbs kótergen teatr men mádenıet salasyna tehnıkalyq mamandardy daıarlaý máselesin oryndy dep baǵalady.

- Bul bastamany zerttep, ony júzege asyrýǵa kómektesý qajet, - dedi Memleket basshysy.

Aıta keteıik, elordadaǵy Táýelsizdik saraıynda Memleket basshysy Qasym-Jomart Toqaevtyń qatysýymen Qazaqstan halqy Assambleıasynyń kezekti HHHІV sessııasy ótip jatyr.

Keńeıtilgen otyrystyń kún tártibi — «Qazaqstan halqy Assambleıasynyń 30 jyldyǵy: qorytyndylar jáne bolashaq mindetter».