Memleket basshysy Qazaqstan boks federatsııasynyń prezıdenti Shahmurat Mútálipti qabyldady
ASTANA. KAZINFORM – Qasym-Jomart Toqaevqa sport ınfraqurylymyn jetildirý, halyqaralyq jáne respýblıkalyq jarystar uıymdastyrý, otandyq boksshylardy jattyqtyrý, balalar men jasóspirimder, sondaı-aq aımaq sportyna jaǵdaı jasaý aıasynda qolǵa alynǵan sharalar jóninde baıandaldy. Bul týraly Aqordanyń baspasóz qyzmeti habarlady.
Memleket basshysy Qazaqstan boks federatsııasynyń Lıverpýlde ótken álem chempıonatyndaǵy tabysty qyzmetine oń baǵa berdi.
Prezıdent memlekettiń boksty damytýǵa basa mán beretinin, bul baǵyttaǵy jumys keshendi túrde júrgizilýge tıis ekenin jetkizdi.
Kezdesýde 2028 jyly Los-Andjeleste ótetin Olımpıada oıyndaryna qazaqstandyq bylǵary qolǵap sheberlerin josparly ári jan-jaqty daıarlaýdyń mańyzy atap ótildi.
Aıta keteıik, Prezıdent Qazaqstan ulttyq quramasynyń múshelerin Álem chempıonatyndaǵy tamasha jeńisimen quttyqtap, bul elimiz úshin tarıhı oqıǵa, halqymyz úshin úlken qýanysh ekenin atap ótti.