Memleket basshysy qazaq tilin damytýǵa baǵyttalǵan birqatar tapsyrma berdi
Memleket basshysy Qasym-Jomart Toqaev «Qazaq tili» qoǵamynyń prezıdenti, Ulttyq quryltaıdyń múshesi Raýan Kenjehanulyn qabyldady, dep habarlaıdy QazAqparat.
Aqorda málimetine súıensek, kezdesý barysynda memlekettik tildi nyǵaıtý isindegi ózekti máseleler talqylandy.
Prezıdent qazaq tilin odan ári damytý máselesi árqashan memlekettik saıasattyń mańyzdy baǵyty bolyp qala beretinin aıtty. Qasym-Jomart Toqaevtyń pikirinshe, eń aldymen, qazaq tiliniń qoldanys aıasyn arttyrýǵa baǵyttalǵan praktıkalyq jumystarǵa basymdyq bergen jón. Onyń ishinde bilim berý isindegi, tehnologııadaǵy jáne medıa salasyndaǵy qazaqsha kontent pen tsıfrlyq ónimderdi ázirleýge aıryqsha mán berý qajet.
Sondaı-aq Prezıdent balalarǵa arnalǵan anımatsııalyq týyndylar shyǵarýdyń, kópshilikke arnalǵan kıno ónimderi men ǵylymı-tanymdyq ádebıetter qoryn molaıtýdyń, áleýmettik jelilerde aǵartýshylyq baǵyttaǵy arnalar ashýdyń mańyzdylyǵyna nazar aýdardy. Oǵan qosa ǵalamdyq tsıfrlyq platformalardy qazaqshalap, til úırenýge múmkindik beretin otandyq aqparattyq júıelerdi kóbeıtý qajettigin atap kórsetti.
Sonymen qatar Prezıdent ártúrli áleýmettik toptardyń, onyń ishinde jastardyń arasynda til tazalyǵyn saqtaý úshin oqý jáne jazý saýattylyǵyn arttyrýǵa arnalǵan sharalardyń qajettiligine erekshe toqtaldy.
Budan bólek, Qasym-Jomart Toqaev «Qazaq tili» qoǵamyn memlekettik tildi ǵylym men tehnıka tiline aınaldyrý baǵytynda jumys júrgizýge shaqyrdy. Sondaı-aq álemdik tájirıbede mádenı, gýmanıtarlyq sıpattaǵy uıymdar endaýment qorlar arqyly jumys isteıtinin atap ótip, Qoǵam qyzmetin odan ári jandandyrý úshin osy tájirıbeni engizýdi usyndy jáne oǵan óz atynan úles qosatynyn málimdedi.
Óz kezeginde «Qazaq tili» qoǵamynyń prezıdenti Raýan Kenjehanuly qordyń bastamasymen júzege asyrylǵan jobalar men aldaǵy jospary jaıynda málimet berdi.
