Memleket basshysy «Káýsar» oqýshylar saraıyn aralap kórdi

QARAǴANDY. KAZINFORM – Qasym-Jomart Toqaev Qaraǵandy qalasynyń Prıshahtınsk yqshamaýdanynda taıaýda ǵana ashylǵan «Káýsar» oqýshylar saraıynyń qyzmetimen tanysty.

Memleket basshysyna mundaǵy 13 úıirme men sektsııaǵa 1600 bala qatysatyny jaıynda málimet berildi. Oqýshylar ıgiligi úshin ortalyqta HI-TECH tseh, shyǵarmashylyq sheberhana, horeografııa zaly, ART-stýdııa, dybys jazý, televıdenıe jáne foto stýdııalary, VR-arhıtektýra jáne WEB-dızaın kabınetteri, Intellectum-stýdııa, Internet zattary kabıneti, robotty tehnıka jáne tehnıkalyq shyǵarmashylyq zerthanasy, STEM-zerthana, mýzykalyq stýdııa, ekologııalyq ortalyq, sport jáne oıyn alańdary ashylǵan.

Jalpy aýdany 3,3 myń sharshy metr bolatyn ǵımarat sapaly qosymsha bilim alýǵa qajetti quraldarmen tolyqtaı jabdyqtalǵan.

Memleket basshysy jas urpaqtyń shyǵarmashylyq jáne kreatıvti damýynyń máni zor ekenine nazar aýdardy. Sondaı-aq qorshaǵan ortany qorǵaýǵa, sonyń ishinde «Taza Qazaqstan» ekologııalyq aktsııasyn ótkizýge basa mán beretinin atap ótti. Prezıdent oqýshylardy osy mańyzdy bastamaǵa belsendi túrde atsalysýǵa shaqyrdy.