Memleket basshysy Qaýipsizdik Keńesiniń otyrysyn ótkizdi
ASTANA.KAZINFORM - Prezıdent Qasym-Jomart Toqaevtyń tóraǵalyǵymen ótken Qaýipsizdik Keńesiniń otyrysynda Úkimet músheleri ǵarysh salasynyń qazirgi jaı-kúıi, iske asyrylyp jatqan jobalar jáne damý perspektıvasy týraly baıandady. Bul týraly Aqorda habarlady.
Memleket basshysy salanyń strategııalyq mánin atap ótip, spýtnıktik baılanys pen ǵarysh ınfraqurylymynyń ornyqty jumys isteýin qamtamasyz etýge erekshe nazar aýdardy.
Premer-mınıstrdiń orynbasary – Jasandy ıntellekt jáne tsıfrlyq damý mınıstri Jaslan Mádıev ekonomıka men memlekettik basqarýdyń ıgiligi úshin spýtnıktik júıelerdi damytýǵa, ǵarysh ınfraqurylymyn jetildirýge, sondaı-aq ǵarysh derekterine negizdelgen qoldanbaly sheshimderdi engizýge baǵyttalǵan negizgi jobalardy júzege asyrý jóninde málimet berdi.
Qasym-Jomart Toqaevtyń aıtýynsha, jahandyq ǵarysh sektory túbegeıli ózgerdi. Bul sala tek iri derjavalardyń «jabyq klýbyna» tıesili bolǵan dáýir artta qaldy. Búginde jeke kompanııalar baılanys, habar taratý, navıgatsııa, ǵarysh monıtorıngi, ǵylymı zertteýler jáne ınternetpen qamtamasyz etý sekildi qoldanbaly baǵyttardy belsendi túrde damytyp keledi.
Budan bólek, ǵaryshty ıgerý ǵylymyn ilgeriletý máseleleri qaraldy. Ásirese, ǵylymı zertteýlerge, sonyń ishinde astrofızıkaǵa qoldaý kórsetý qajettigi atap ótildi. Ulttyq tehnologııalyq jáne ınjenerlik áleýetti nyǵaıtýdyń mańyzdy kezeńi sanalǵan «Báıterek» jobasyn iske asyrý barysy oń baǵalandy.
Sondaı-aq Memleket basshysy halyqaralyq yntymaqtastyq perspektıvasyna toqtalyp, Reseı Federatsııasymen jáne basqa da sheteldik seriktestermen strategııalyq yqpaldastyqty damytý qajet ekenin aıtty. Baıqońyr qalasy men oǵan jaqyn aýdandarda turatyn azamattardyń áleýmettik-turmystyq jaǵdaıyn jaqsartýǵa mán berildi.
Prezıdent Úkimetke ǵarysh salasyn jańǵyrtýdy jáne onyń áleýetin memleket múddesine tıimdi paıdalanýdy kózdeıtin birqatar naqty tapsyrma berdi.
Prezıdent Qorǵanys mınıstrine Qarýly kúshterdiń jaýyngerlik daıarlyǵyn jetildirýdi tapsyrǵanyn jazǵan edik.
