Memleket basshysy Qaýipsizdik Keńesiniń otyrysyn ótkizdi
ASTANA.KAZINFORM - Prezıdent Qasym-Jomart Toqaevtyń tóraǵalyǵymen Qazaqstan Respýblıkasynyń 2021-2025 jyldarǵa arnalǵan ulttyq qaýipsizdik strategııasyn júzege asyrý qorytyndysy shyǵaryldy. Bul týraly Aqordanyń baspasóz qyzmeti habarlady.
Úkimet negizgi kórsetkishterge qol jetkizý týraly esep berdi. Sondaı-aq birqatar salalyq memlekettik organ jetekshileri basty baǵyttar boıynsha baıandama jasady.
Memleket basshysy geosaıası ahýaldy eskere otyryp, qoǵamdyq, ekonomıkalyq, ekologııalyq, sý jáne azyq-túlik qaýipsizdigi máselelerin pysyqtaý qajettigine nazar aýdardy.
Budan bólek, otyrysta Qazaqstan Respýblıkasynyń 2026-2030 jyldarǵa arnalǵan ulttyq qaýipsizdik strategııasynyń jobasy qaraldy.
Memlekettik josparlaý júıesiniń mańyzdy quramdas bóligi sanalatyn bul Strategııa aldaǵy bes jylda bolýy yqtımal syn-qaterlerge tótep berýdiń negizgi tásilderin anyqtaıdy.
Jıynda Premer-mınıstrdiń orynbasary — Ulttyq ekonomıka mınıstri Serik Jumanǵarın orta merzimge arnalǵan basymdyqtar, maqsatty ındıkatorlar men strategııalyq táýekelderdi basqarý mehanızmderi jóninde baıandady.
Qasym-Jomart Toqaevtyń aıtýynsha, jańa Konstıtýtsııany qabyldaý arqyly memleket damýyndaǵy jańa kezeńge qadam basyp, Qazaqstannyń Táýelsizdigin, egemendigi men aýmaqtyq tutastyǵyn senimdi túrde qorǵaýǵa múmkindik týdy.
Al atalǵan Strategııa konstıtýtsııalyq qaǵıdattardyń múltiksiz saqtalýyn qamtamasyz etip, elimizdiń turaqty ári qarqyndy damýyna jaǵdaı jasaıdy.
Memleket basshysy ulttyq múddeni qorǵaý mindetterin sapaly oryndaýdyń mańyzyna basa mán berdi. Onyń qataryna, atap aıtqanda, qorǵanys qabiletin qamtamasyz etý; azamattardy, qorshaǵan ortany jáne aqparattyq keńistikti qorǵaý deńgeıin arttyrý; kıberqaýipsizdik sharalaryn kúsheıtý jáne áleýmettik-ekonomıkalyq saladaǵy táýekelderdi azaıtý máseleleri kiredi.
Sonymen qatar Qasym-Jomart Toqaev ekonomıka, bilim men tehnologııa salalarynda suranysqa ıe bilikti sheteldik mamandardy tartýǵa qolaıly jaǵdaı jasaıtyn baǵdarlamany jedeldetip ázirleýdi tapsyrdy.
Aıta ketelik búgin Memleket basshysynyń ókimimen Baýyrjan Artyqov «Batys» óńirlik qolbasshylyǵy áskerleriniń qolbasshysy laýazymynan bosatylǵan edi.
