Memleket basshysy Qaýipsizdik Keńesiniń otyrysyn ótkizdi
Qasym-Jomart Toqaevtyń tóraǵalyǵymen QR Qaýipsizdik Keńesiniń otyrysy ótti. Jıynda azyq-túlik qaýipsizdigin qamtamasyz etý jónindegi problemalar qarastyryldy. Kazinform bul týraly Aqordaǵa silteme jasap habarlaıdy.
Otyrys barysynda eldiń azyq-túlik táýelsizdigin nyǵaıtýǵa qatysty birqatar másele talqylandy.
Jıynnyń kún tártibine sáıkes Premer-Mınıstrdiń orynbasary Serik Jumanǵarın sóz sóıledi. Sondaı-aq qabyldanǵan jáne josparlanǵan sharalar týraly birqatar ýákiletti memlekettik organ basshylary esep berdi.
Talqylaý nátıjesi boıynsha Memleket basshysy halyqty qoljetimdi ári sapaly azyq-túlikpen qamtamasyz etý máselesin negizgi basymdyq retinde atap ótti.
Azyq-túlik taýarlaryn óndirý men satýdyń barlyq satysynda baǵa belgileýdiń ashyq bolýy, ónimsiz deldaldarmen kúres júrgizýdiń mańyzdy ekenine nazar aýdaryldy.
Demografııalyq úrdisterdi eskere otyryp, azyq-túliktiń fızıkalyq turǵyda qoljetimdiliginiń perspektıvalary eńbek ónimdiliginiń ósýine, aýyl sharýashylyǵy men otandyq agrarlyq ǵylymnyń jańǵyrýyna tikeleı baılanysty ekeni atap ótildi.
Jerdi tozýdan qorǵaý sharalaryn jandandyrý ózekti másele bolyp otyr. Sondaı-aq aýyl sharýashylyǵy tehnıkasy parkin jańartý protsesin júıeli túrde uıymdastyrý jáne jergilikti jaǵdaıǵa beıimdelgen menshikti tuqym qoryn qurý úshin jańa tásilder qajet.
Budan bólek, aýyl sharýashylyǵy salasyna kórsetiletin memlekettik qoldaý sharalaryna erekshe nazar aýdaryldy.
– «Sýbsıdııalaý agroónerkásip keshenindegi ónimdilikti arttyrýǵa yqpal etýge tıis. Sýbsıdııany bólý kezinde óńirlik erekshelikterdi, egis alqaptarynyń kólemin jáne aýyl sharýashylyǵy daqyldaryn tańdaýdy eskergen jón», - dedi Qasym-Jomart Toqaev.
Sonymen qatar Prezıdent azyq-túlik ónimderin óndirýmen aınalysatyn sharýalar men kásiporyndarǵa memlekettik qoldaý kórsetýdi talap etetin ekonomıkalyq konıýnktýrany ózgertýge jedel nazar aýdarý qajettigine nazar aýdardy.
Aýyl sharýashylyǵy óndirisine ınfraqurylym turǵysynan qoldaý kórsetý isi (aýylda jumys ornyn ashý, fıtosanıtarııalyq jáne veterınarııalyq qorǵaý júıesiniń tıimdiligin arttyrý) arnaıy másele retinde qarastyryldy.
Bul rette quqyq qorǵaý organdaryna aýyl sharýashylyǵy maqsatyna arnalǵan sýbsıdııalar men jerlerdi bólý kezinde sybaılas jemqorlyqqa qarsy kúres jumystaryn jalǵastyrý tapsyryldy.
Memleket basshysy jıyn sońynda Úkimet pen ýákiletti organdarǵa azyq-túlik táýelsizdigin nyǵaıtý, azyq-túliktiń ekonomıkalyq turǵyda qoljetimdi bolýyn arttyrý jáne otandyq agroónerkásip kesheniniń áleýetin anaǵurlym tolyq iske asyrý jóninde naqty tapsyrmalar berdi.
